Qashqadaryo viloyatining eng so‘lim go‘shalari — Dehqonobod va Yakkabog‘ tumanlarida Navro‘z munosabati bilan bayram tantanalari bo‘lib o‘tdi.
Viloyatning Dehqonobod tumani markazidagi Mustaqillik maydoni erta tongdanoq gavjum bo‘ldi. Bayram ishtirokchilari karnay-surnay sadolari ostida kutib olindi.
Milliy udumga ko‘ra dastlab keksalarga bayram noz-neʼmatlari ulashilib, yurtga tinchlik, elga omonlik, dehqonchilik yumushlari va hosilga qut-baraka tilab, duolar qilindi.
Dehqonobod tumani hokimi Zoir Aliqulov tuman ahlini bayram bilan qutlab, sharqona Yangi yil arafasida tumanda amalga oshirilgan yangiliklar haqida maʼlumot berdi.
.jpg)
Navro‘z tantanalari viloyatning Yakkabog‘ tumanida ham davom etdi. Xalq sayillari sportchi yoshlarning ko‘rgazmali chiqishlari, dor va milliy o‘yin musobaqalari bilan boshlandi. Kurash, tosh ko‘tarish, arqon tortish, varraklar sayli, xalq amaliy sanʼati — folklor namunalari, bir-biridan mazali milliy taomlar tanlovlari o‘tkazildi.
Xiyobon bo‘ylab o‘rnatilgan doshqozonlarda Navro‘zning shoh taomi — sumalak qaynadi, osh damlanib, bayram ishtirokchilariga tarqatildi.
Folklor guruhlari, xalq ansambllari, badiiy havaskorlik jamoalari tomonidan xalqona kuy-qo‘shiqlar, o‘lan-laparlar ijro etildi.
Navro‘z sayli davomida yakkabog‘liklar kurash ham tushib, polvon yigit-qizlarning eng saralarini aniqlab oldi va bayram sovg‘alarini ulashdi.
Izoh (0)