Тонгда янграган баҳор мадҳи, курашаётган полвон қизлар ва мухлислари билан ўйинга тушган Маҳмуд Намозов — Қашқадарёда Наврўз

Қашқадарё вилоятининг энг сўлим гўшалари — Деҳқонобод ва Яккабоғ туманларида Наврўз муносабати билан байрам тантаналари бўлиб ўтди. 

Вилоятнинг Деҳқонобод тумани марказидаги Мустақиллик майдони эрта тонгданоқ гавжум бўлди. Байрам иштирокчилари карнай-сурнай садолари остида кутиб олинди.

Миллий удумга кўра дастлаб кексаларга байрам ноз-неъматлари улашилиб, юртга тинчлик, элга омонлик, деҳқончилик юмушлари ва ҳосилга қут-барака тилаб, дуолар қилинди.

Деҳқонобод тумани ҳокими Зоир Алиқулов туман аҳлини байрам билан қутлаб, шарқона Янги йил арафасида туманда амалга оширилган янгиликлар ҳақида маълумот берди.

Наврўз тантаналари вилоятнинг Яккабоғ туманида ҳам давом этди. Халқ сайиллари спортчи ёшларнинг кўргазмали чиқишлари, дор ва миллий ўйин мусобақалари билан бошланди. Кураш, тош кўтариш, арқон тортиш, варраклар сайли, халқ амалий санъати — фолклор намуналари, бир-биридан мазали миллий таомлар танловлари ўтказилди.

Хиёбон бўйлаб ўрнатилган дошқозонларда Наврўзнинг шоҳ таоми — сумалак қайнади, ош дамланиб, байрам иштирокчиларига тарқатилди.

Фолклор гуруҳлари, халқ ансамбллари, бадиий ҳаваскорлик жамоалари томонидан халқона куй-қўшиқлар, ўлан-лапарлар ижро этилди.

Наврўз сайли давомида яккабоғликлар кураш ҳам тушиб, полвон йигит-қизларнинг энг сараларини аниқлаб олди ва байрам совғаларини улашди.