KXDR AQSHning Shimoliy Koreya noroziligiga e’tibor bermasdan, unga qarshi “provokatsion harakatlarni davom ettirishini” urush e’lon qilish deb baholashi mumkin. Bu haqda KXDR tashqi ishlar vazirligining AQSH bilan munosabatlarni nazorat qiluvchi departament direktori Kvon Chjon Gin ma’lum qildi, deb xabar bermoqda Koreya markaziy telegraf agentligi.
“AQSH bunday provokatsion harakatlarning davom etishi, KXDRga nisbatan dushmanlik, bizning takroriy norozilik va ogohlantirishlarimizga e’tibor bermasligi davlatimizga qarshi urush e’lon qilish sifatida baholanishi mumkinligini tushunishi kerak”, — dedi Kvon Chjono Gin.
Diplomatning so‘zlariga ko‘ra, Qo‘shma Shtatlar Janubiy Koreyada strategik vositalarni joylashtirishdan tiyilishi va KXDRga qarshi qaratilgan barcha harbiy mashg‘ulotlarni to‘xtatishi kerak.
19-fevral kuni AQSH, Yaponiya va Janubiy Koreyaning qo‘shma mashg‘ulotlari haqida e’lon qilingandi. Ularda kamida bitta Amerika B-1B strategik bombardimonchi samolyoti ishtirok etadi.
Ushbu mashg‘ulotlar fonida KXDR raketa sinovlarini o‘tkazmoqda. Xususan, 23-fevralga o‘tar kechasi Pxenyan Yapon dengizi tomon to‘rtta Xvasal-2 strategik qanotli raketalarini uchirdi.
Ushbu uchirishlar fonida AQSH va Janubiy Koreya Shimoliy Koreyaning yadroviy tahdidlarini birgalikda tiyib turishni kuchaytirish uchun yaqin orada qo‘shimcha mashg‘ulotlar o‘tkazishga kelishib oldi.
Izoh (0)