Ўзбекистонда референдумга тайёргарлик кўриш харажатлари 182 миллиард 386 миллион сўмга баҳоланди. Бу ҳақда Марказий сайлов комиссиясининг навбатдаги мажлисида комиссия аъзоси Адҳам Ибодуллаев маълум қилди.
Адҳам Ибодуллаев мажлисда Марказий сайлов комиссияси Иқтисодиёт ва молия вазирлиги билан ҳамкорликда ишлаб чиқилган референдумга тайёргарлик кўриш ва уни ўтказиш билан боғлиқ харажатлар сметаси ҳақида батафсил маълумот берди.
“Мазкур харажатлар сметаси давлат бюджетида белгиланган маблағлар доирасида шакллантирилди ва ўрнатилган тартибда Иқтисодиёт ва молия вазирлиги билан келишилди. Харажатлар сметасини шакллантиришда референдум тўғрисидаги қонун талабларидан келиб чиқиб, референдумга тайёргарлик кўриш ва уни ўтказиш билан боғлиқ барча маблағ талаб этиладиган жиҳатлар алоҳида ҳисобга олинди”, — деб қайд этган МСК аъзоси.
Олий Мажлис Сенати 14 март куни бўлиб ўтган мажлисда янги таҳрирдаги Конституция тўғрисидаги қонун лойиҳаси бўйича референдум ўтказиш тўғрисидаги қарорни маъқуллаганди. Қонун лойиҳаси “Халқ сўзи” ва “Народное слово” газеталарининг 15 март кунги сонида эълон қилинди. Қонун лойиҳаси 6 бўлим, 155-моддадан иборат. Конституциявий қонун референдум якунлари Марказий сайлов комиссияси томонидан расмий эълон қилинган кундан эътиборан кучга киради.
Эслатиб ўтамиз, 2021 йилда бўлиб ўтган Ўзбекистон президенти сайловига тайёргарлик кўриш ва уни ўтказиш билан боғлиқ харажатларни молиялаштириш учун 300 миллиард сўм ажратилган эди.
Изоҳ (0)