Farg‘ona viloyati Buvayda tumanida er o‘zaro kelishmovchilik sabab bolta bilan xotiniga jarohat yetkazdi. Bu haqda “Sevimli” telekanalining “Zamon” informatsion dasturida ma’lum qilindi.
Qayd etilishicha, fuqaro E.R. spirtli ichimlikka ruju qo‘yib, keyin tuzalish yo‘liga o‘tgan bo‘lsa-da, turmush o‘rtog‘i va farzandlari turli kinoyali gaplarni gapiravergan. Bir safar o‘g‘liga pichoq bilan tahdid qilgani uchun yigit IIBga ariza bilan murojaat qilgan va sudda otaga nisbatan jarima jazosi tayinlangan.
2022-yil oxirlarida fuqaro E.R. rafiqasi yana turli gaplarni aytganidan g‘azablanib, uning hojatxonadan chiqib kelishini poylab turgan va ayoliga ajoyib sovg‘a tayyorlab qo‘yganini aytgan. Xotin qanaqa sovg‘a ekanini so‘raganida, E.R. uni yerga yiqitib, shu yerda turgan boltaning orqa tarafi bilan ayolning peshonasiga urgan. Erkak yana urmoqchi bo‘lganida ayol o‘zini himoya qilgan va farzandlari yetib kelib, boltani tortib olgan.
Sud-tibbiy ekspertizasi xulosasida ayolga o‘rtacha og‘ir darajadagi tan jarohati yetkazilgani ko‘rsatilgan. Holat yuzasidan jinoyat ishi qo‘zg‘atilgan bo‘lib, jabrlanuvchiga davolanishi uchun qaynotasi 1,5 ming AQSH dollari bergan.
Jinoyat ishlari bo‘yicha Beshariq tuman sudida ko‘rib chiqilgan mazkur ishda ayblanuvchi E.R. Jinoyat kodeksining 105-moddasi (qasddan badanga o‘rtacha og‘ir shikast yetkazish) 2-qismi bilan aybli deb topilib, 3 yilu 1 oy muddatga ozodlikdan mahrum etilgan.
Izoh (0)