Andijonda qarzdor onadan 2 nafar farzandi uchun 32 mln so‘m aliment puli undirildi. Bu haqda “Daryo”ga MIB Andijon viloyati boshqarmasi axborot xizmati xabar bermoqda.
Maʼlum qilinishicha, fuqaro M.N. eri I.N. bilan turmushi davomida uch nafar farzandi dunyoga keltirgan. Ayol 2019-yilda farzandlarini otasi qaramog‘iga tashlab, o‘zi ishlash maqsadida Rossiya Federatsiyasiga chiqib ketgan. Shundan so‘ng I.N. 2020-yilning bahorida ayolidan ikki nafar voyaga yetmagan farzandlari uchun aliment undirish masalasida sudga murojaat qilgan.
Fuqarolik ishlari bo‘yicha Asaka tumanlararo sudi I.N.ning daʼvosini qanoatlantirib, M.N.dan uning foydasiga ikki nafar farzandlarining moddiy taʼminoti uchun aliment undirilishini belgilab bergan.
Ijro hujjati Byuroning Marhamat tuman bo‘limiga kelib tushgach, ijro harakatlariga kirishilgan. Biroq qarzdor 2023-yilga qadar Rossiya Federatsiyasida bo‘lgani sababli aliment qarzdorligi to‘planib, jami 32 mln. so‘mga borib yetgan.
Fevral oyida Byuro xodimlari tomonidan ayolning qaytganligi aniqlanib, qarzdor M.N.gi aliment to‘lamaslik qonunda belgilangan tartibda javobgarlikka sabab bo‘lishi mumkinligi tushuntirilgan. Shuningdek, ish hujjatlari Jinoyat ishlari bo‘yicha tuman sudiga yuborilishi yuzasidan ogohlantirilgan.
Shundan so‘ng, onalik vazifasini bajarmasdan eriga bolalarini tashlab ketgan M.N. qonuniy majburiyatlarini anglab yetib, farzandlari taʼminoti uchun 32 million 800 ming so‘m aliment pullarini to‘lab berishi taʼminlangan.
Izoh (0)