Шаҳрихон туманида алимент тўлашдан қочиб, уйининг ертўласида яшириниб юрган эркак ушланиб, 15 суткага қамалди. Бу ҳақда “Дарё” мухбири Умиджон Мамарасулов хабар бермоқда.
Бюронинг Андижон вилояти бошқармаси ахборот хизматининг маълум қилишича, Бюронинг Шаҳрихон туман бўлими иш юритувига Фуқаролик ишлари бўйича Бўз туманлараро судининг 2019 йил 25 декабрдаги суд буйруғига асосан қарздор М.С.дан ундирувчи М.М. фойдасига икки нафар фарзанди учун алимент ундириш ҳақидаги ижро ҳужжати келиб тушган.
Ижро ҳужжатининг ижросини таъминлаш мақсадида давлат ижрочиси томонидан қарздор М.С. алимент қарзини тўлаши лозимлиги ҳақида бир неча маротаба огоҳлантирилганлигига қарамасдан алимент тўлашдан қочиб яшириниб юрган. Натижада қарздорлик 37 миллион 756 минг сўмга бориб етган. Қарздорга нисбатан 2021 йилнинг 18 май куни қидирув эълон қилинган.
Куни кеча бюронинг туман бўлими ходимлари томонидан қарздорга тегишли мол-мулкларни кўздан кечириш мақсадида унинг яшаш хонадонига борилганда қарздорнинг отаси ўғли уйининг ертўласида яшириниб юрганлигини маълум қилган. Кўрсатмага асосан хонадон ертўласи текширилганида ҳақиқатан қарздор М.С. яшириниб ўтирганлиги аниқланиб, ушланган ва иш ҳужжатлари судга тақдим қилинган.
Ушбу ишни кўриб чиққан Жиноят ишлари бўйича Шаҳрихон туман суди қарздор М.С.ни Маъмурий Жавобгарлик тўғрисидаги Кодекснинг 47-4-моддасига асосан айбли деб топиб, унга нисбатан 15 сутка маъмурий қамоқ жазоси тайинлаган.
Аввалроқ Андижонда қарздор онадан 2 нафар фарзанди учун 32 млн сўм алимент пули ундирилгани хабар қилинганди.
Изоҳ (0)