O‘zbekistonda shaharlararo yo‘nalishlarda qo‘shimcha avtobus qatnovlari tashkil etilmoqda

O‘zbekistonda Navro‘z bayrami munosabati bilan shaharlararo yo‘nalishlarda qo‘shimcha avtobus qatnovlari tashkil etilmoqda. Bu haqda Transport vazirligi axborot xizmati xabar berdi. 

Xabarga ko‘ra, vazirlik Navro‘z umumxalq bayrami munosabati bilan fuqarolarga qo‘shimcha qulayliklar yaratish, yo‘lovchilarni o‘z vaqtida manzillariga xavfsiz yetkazib qo‘yishni tashkil etish, shuningdek, dam olish kunlarida ichki turizmni rivojlantirish maqsadida “Uzautotrans service” korxonasining “Toshkent” avtovokzalidan kunlik tasdiqlangan grafik asosida qatnovchi reyslaridan tashqari qo‘shimcha qatnovlarni tashkil etmoqda.

Xususan, 14–19-mart kunlari jami 34 ta qo‘shimcha reyslar tashkil etilishi rejalashtirilgan. 16-mart kuni Qorako‘l (1 ta), Uzun (2 ta), Xiva (4 ta), Termiz (3 ta) shaharlariga qo‘shimcha 10 ta reys tashkil etildi.
  
Shuningdek, talab yuqori bo‘lgan yo‘nalishlarda yo‘lovchilar oqimidan kelib chiqib, yana qo‘shimcha reyslar tashkil qilinadi.