Fox News telekanali boshlovchisi Sean Xanniti 14-mart kuni Qora dengiz ustidagi xalqaro havo hududida Rossiya samolyoti bilan AQSH dronining to‘qnashib ketishini “tasodif emas” deb atadi.
“Putin bezorilari (Rossiya qiruvchilari nazarda tutilmoqda — “Daryo” izohi) dronimizga xavfli darajada yaqinlashib, unga bir necha marta yonilg‘i uloqtirgan, parragini ishdan chiqargan, 14 million dollarlik dronimizni dengizga cho‘ktirgan. Ba’zilar to‘qnashuv qasddan qilinmaganini, rossiyalik uchuvchilar shunchaki provokatsion va qobiliyatsiz havaskorlar bo‘lganini aytmoqda. Adashmang, bu tasodif emas. Sizga kafolat berib aytamanki, bu harbiy tajovuzni Vladimir Putinning shaxsan o‘zi imzolagan”.
Jurnalist Rossiyaning AQSHga nisbatan dushmanligi va agressiyasi yangi cho‘qqiga chiqqanini ta’kidladi va endi bir savol qolganini aytdi: “Prezidentingiz Jo Bayden endi nima qiladi? Yanayam ko‘proq sanksiyalar kiritadimi? Putin bunga parvo ham qilmaydi, chunki u energiyasini Xitoyga, butun dunyoga sotib boyimoqda. Yana bir bor so‘rayman, Jo, bu safar nima qilmoqchisan? Jo Bayden, sen AQSH prezidentisan. Bosh qo‘mondonsan. Achinarli haqiqat shundaki, aftidan hech narsa qilmaysan”.
14-mart kuni AQSH harbiylari MQ-9 Reaper droni Qora dengiz ustida Rossiyaning Su-27 qiruvchi samolyoti bilan to‘qnashib ketganini xabar qildi. AQSH harbiylari bayinotiga ko‘ra, samolyot dronni urib tushirgan. Rossiya Mudofaa vazirligi qiruvchi va dron o‘rtasida aloqa bo‘lmaganini daʼvo qilmoqda. “Dron keskin manyovrlar tufayli balandlikni yo‘qotib nazoratsiz parvoz qildi va suv yuzasiga quladi”, — deb tushuntirdi ular.
New York Times gazetasi yuqori martabali harbiy amaldorga tayanib, MQ-9 Reaper Ruminiyadagi bazadan rejalashtirilgan topshiriqni bajarish uchun kecha ertalab havoga ko‘tarilganini, unda qurol yo‘qligini yozdi.
Keyinroq CBS telekanali Qora dengiz ustida Rossiya qiruvchisi va Amerika droni to‘qnashuvi aks etgan videorekonstruksiyani e’lon qildi. Videodan ma’lum bo‘lishicha, ikki qiruvchi samolyot yarim soat ichida dron atrofida 19 marta aylanib, unga yonilg‘i uloqtirgan. Yonilg‘i dron parragiga tegib, uning ishdan chiqishiga sabab bo‘lgan.
Oq uy Milliy xavfsizlik kengashining strategik aloqalar bo‘yicha koordinatori Jon Kirbi AQSH Qora dengizga qulagan Amerika droni “begona qo‘llarga tushib qolmasligi” uchun zarur choralar ko‘rganini aytdi.
Izoh (0)