Kolumbiya Harbiy-dengiz kuchlari zobitlari bortida bir tonnadan ortiq kokain bo‘lgan suvosti kemasini qo‘lga oldi. Bu haqda Fox News respublika harbiylariga tayanib xabar berdi.
Markaziy Amerikaga ketayotgan suvosti kemasida bahosi 87 million dollarga yaqin 1 367 kilogramm kokain bo‘lgan. Taxminan 15 metr uzunlikdagi suvosti kemasida avariya yuz bergan, oqibatda yonilg‘idan zaharli gazlar ajralib chiqqan. Ikki gumonlanuvchi halok bo‘lgan, yana ikki kishi og‘ir jarohatlangan.
Mart oyi boshida banan solingan konteynerlarga yashirilgan 8,8 tonnalik kokain partiyasi Ekvador politsiyasi tomonidan ushlangan edi. Politsiya boshlig‘i Fausto Salinasning so‘zlariga ko‘ra, agar giyohvand moddalar o‘z manziliga yetib borganida, narkosavdo bilan shug‘ullanuvchilar uni sotishdan 330 million dollardan ko‘proq daromad olishi mumkin edi.
So‘nggi yillarda Ekvador narkokartellarning logistika zanjirlarida Janubiy Amerikaning asosiy tranzit mamlakatlaridan biriga aylandi. Qo‘shni Peru va Kolumbiyada ishlab chiqarilgan kokain muntazam ravishda Ekvador portlaridan topilmoqda. Birgina 2022-yilda mahalliy politsiya 200 tonnadan ortiq A toifali giyohvand moddalarni musodara qildi.
Izoh (0)