Fox News телеканали бошловчиси Сеан Ханнити 14 март куни Қора денгиз устидаги халқаро ҳаво ҳудудида Россия самолёти билан АҚШ дронининг тўқнашиб кетишини “тасодиф эмас” деб атади.
“Путин безорилари (Россия қирувчилари назарда тутилмоқда — “Дарё” изоҳи) дронимизга хавфли даражада яқинлашиб, унга бир неча марта ёнилғи улоқтирган, паррагини ишдан чиқарган, 14 миллион долларлик дронимизни денгизга чўктирган. Баъзилар тўқнашув қасддан қилинмаганини, россиялик учувчилар шунчаки провокацион ва қобилиятсиз ҳаваскорлар бўлганини айтмоқда. Адашманг, бу тасодиф эмас. Сизга кафолат бериб айтаманки, бу ҳарбий тажовузни Владимир Путиннинг шахсан ўзи имзолаган”.
Журналист Россиянинг АҚШга нисбатан душманлиги ва агрессияси янги чўққига чиққанини таъкидлади ва энди бир савол қолганини айтди: “Президентингиз Жо Байден энди нима қилади? Янаям кўпроқ санкциялар киритадими? Путин бунга парво ҳам қилмайди, чунки у энергиясини Хитойга, бутун дунёга сотиб бойимоқда. Яна бир бор сўрайман, Жо, бу сафар нима қилмоқчисан? Жо Байден, сен АҚШ президентисан. Бош қўмондонсан. Ачинарли ҳақиқат шундаки, афтидан ҳеч нарса қилмайсан”.
14 март куни АҚШ ҳарбийлари МҚ-9 Reaper дрони Қора денгиз устида Россиянинг Су-27 қирувчи самолёти билан тўқнашиб кетганини хабар қилди. АҚШ ҳарбийлари байинотига кўра, самолёт дронни уриб туширган. Россия Мудофаа вазирлиги қирувчи ва дрон ўртасида алоқа бўлмаганини даъво қилмоқда. “Дрон кескин манёврлар туфайли баландликни йўқотиб назоратсиз парвоз қилди ва сув юзасига қулади”, — деб тушунтирди улар.
New York Times газетаси юқори мартабали ҳарбий амалдорга таяниб, МҚ-9 Reaper Руминиядаги базадан режалаштирилган топшириқни бажариш учун кеча эрталаб ҳавога кўтарилганини, унда қурол йўқлигини ёзди.
Кейинроқ CBS телеканали Қора денгиз устида Россия қирувчиси ва Америка дрони тўқнашуви акс этган видеореконструкцияни эълон қилди. Видеодан маълум бўлишича, икки қирувчи самолёт ярим соат ичида дрон атрофида 19 марта айланиб, унга ёнилғи улоқтирган. Ёнилғи дрон паррагига тегиб, унинг ишдан чиқишига сабаб бўлган.
Оқ уй Миллий хавфсизлик кенгашининг стратегик алоқалар бўйича координатори Жон Кирби АҚШ Қора денгизга қулаган Америка дрони “бегона қўлларга тушиб қолмаслиги” учун зарур чоралар кўрганини айтди.
Изоҳ (0)