O‘zbekiston U-20 terma jamoasi bosh murabbiyi Ravshan Haydarov yoshlar o‘rtasidagi Osiyo Kubogi yarim finalidan o‘rin olgan Janubiy Koreyaga qarshi bahs oldidan matbuot anjumanida ishtirok etdi.
O‘yin haqida:
Ertaga bizni muhim uchrashuv kutib turibdi. Tiklanish-tayyorgarlik jarayonlari reja bo‘yicha yaxshi o‘tdi, o‘ylaymanki, yarim finalda o‘zimiz uchun kerakli bo‘lgan natijani qo‘lga kiritamiz.
Futbolchilarning ayni paytdagi holati haqida:
Biz terma jamoaga eng munosib nomzodlarni chaqirganmiz. Bizda 23 nafar kuchli futbolchi bor. Ular individual mahoratli. Lekin biz uchun jamoaviy o‘yin muhim hisoblanadi. Aynan shuning ustida doimiy ishlab boryapmiz va e’tiborimizni shunga qaratganmiz.
Koreyaga qarshi o‘yin uslubi haqida:
Avstraliyaga qarshi o‘tgan bahsda juda ko‘p vaziyatlar yaratdik. Agar siz yutishni xohlasangiz, gol urishingiz, vaziyatlar yaratishingiz kerak.
Koreya hujumda yaxshi harakat qiladi. Ular barcha o‘yinlarda birinchi raqamli bo‘lib harakat qilishdi. Jamoaning hujum va yarim himoyasida tezkor futbolchilar bor. Biroq biz ham o‘zimizning o‘yinimiz, rejamiz bo‘yicha maydonga tushamiz.
Eslatib o‘tamiz, O‘zbekiston va Janubiy Koreya o‘rtasidagi bahs 15-mart, chorshanba kuni 19:00 da start oladi.
Izoh (0)