Ўзбекистон U-20 терма жамоаси бош мураббийи Равшан Ҳайдаров ёшлар ўртасидаги Осиё Кубоги ярим финалидан ўрин олган Жанубий Кореяга қарши баҳс олдидан матбуот анжуманида иштирок этди.
Ўйин ҳақида:
Эртага бизни муҳим учрашув кутиб турибди. Тикланиш-тайёргарлик жараёнлари режа бўйича яхши ўтди, ўйлайманки, ярим финалда ўзимиз учун керакли бўлган натижани қўлга киритамиз.
Футболчиларнинг айни пайтдаги ҳолати ҳақида:
Биз терма жамоага энг муносиб номзодларни чақирганмиз. Бизда 23 нафар кучли футболчи бор. Улар индивидуал маҳоратли. Лекин биз учун жамоавий ўйин муҳим ҳисобланади. Айнан шунинг устида доимий ишлаб боряпмиз ва эътиборимизни шунга қаратганмиз.
Кореяга қарши ўйин услуби ҳақида:
Австралияга қарши ўтган баҳсда жуда кўп вазиятлар яратдик. Агар сиз ютишни хоҳласангиз, гол уришингиз, вазиятлар яратишингиз керак.
Корея ҳужумда яхши ҳаракат қилади. Улар барча ўйинларда биринчи рақамли бўлиб ҳаракат қилишди. Жамоанинг ҳужум ва ярим ҳимоясида тезкор футболчилар бор. Бироқ биз ҳам ўзимизнинг ўйинимиз, режамиз бўйича майдонга тушамиз.
Эслатиб ўтамиз, Ўзбекистон ва Жанубий Корея ўртасидаги баҳс 15 март, чоршанба куни 19:00 да старт олади.
Изоҳ (0)