Россия президенти Владимир Путин Украинадаги уруш бошланганидан буён илк бор шу ҳафта Кремлда бизнес-магнатлар билан учрашади. Бу ҳақда тадбир ташкилотчиларига таяниб, Bloomberg хабар берди.
Маълум қилинишича, 16 апрель куни Россия Саноатчилар ва тадбиркорлар иттифоқининг (РСТИ) юқори аъзолари билан йиғилиш бўлиб ўтади. Учрашув ўсиб бораётган харажатларни қоплашга қийналаётган ҳукумат компанияларга солиқларни кўпроқ тўлаш учун босимни кучайтираётган бир пайтда бўлиб ўтди. 2022 йилги магнатлар билан учрашув уруш фонида бекор қилинганди.
“2023 йилги мурожаатда Путин асосий эътиборни иқтисодий ўсишни жонлантириш ва бизнес олдида турган катта масъулиятга қаратмоқчи”, — дейилади хабарда.
Айни пайтда магнатлар давлатнинг иқтисоддаги роли ортиб бораётганидан хавотир билдиришга умид қилмоқда ва бизнес муҳитини либераллаштириш чораларини илгари сурмоқда. Улар орасида айрим иқтисодий жиноятларни, жумладан жиноий даромадларни легаллаштиришни декриминаллаштириш ҳам бор.
Кремл матбуот котиби Дмитрий Песков Путиннинг режалари ҳақида изоҳ беришдан бош тортган.
Урушга сарфланадиган харажатлар ошиб бораётгани сабабли бюджет тақчиллигининг кенгайишига дуч келган ҳукумат компанияларни бу йил қўшимча йиғимлар учун 300 млрд рубл (3,9 млрд доллар) тўлашга мажбур қилди. 2022 йили кўплаб магнатлар Путин билан омма олдида чиқиш уларни санкциялар нишонига айлантириши мумкинлигидан хавотирланган.
Россия Саноатчилар ва тадбиркорлар иттифоқи бошқарув аъзоларидан бири Алишер Усмонов 2022 йили нафақага чиқиш ва хайрия ишларига эътибор қаратиш истагини айтиб, ўз лавозимини тарк этганди. РСТИ йиғилишларида Путин одатда нутқ сўзлайди ва кейин ёпиқ эшиклар ортида муҳокама қилади. Путин февраль ой хорижда яшовчи йирик бизнес эгаларини ўз тақдирларини ўз ватанлари билан тўғридан тўғри боғлашга чақирган.
Изоҳ (0)