Namangan viloyati To‘raqo‘rg‘on tumanida 21 yoshli ayol turmush o‘rtog‘i unga e’tibor bermayotgani uchun jinoyatga qo‘l urdi, deb xabar beradi IIV huzuridagi Tergov departamenti.
Qayd etilishicha, 10-fevral kuni To‘raqo‘rg‘on IIBga 21 yoshli B.M. qo‘ng‘iroq qilib, nomaʼlum shaxs To‘raqo‘rg‘on tumani Hamroh ko‘chasida joylashgan xonadoniga yuziga niqob taqqan holda kirib, uni va 1 yoshli qizini o‘ldirish bilan qo‘rqitib, hayot va sog‘lik uchun xavfli bo‘lgan zo‘rlik ishlatgani to‘g‘risida murojaat qilgan. Ayolning so‘zlariga ko‘ra, jinoyatchi qo‘lida bo‘lgan pichoq bilan uning bo‘yin qismiga jarohat yetkazib, uyda bo‘lgan 19,2 million so‘mlik tilla-taqinchoqlarini bosqinchilik yo‘li bilan qo‘lga kiritib, voqea joyidan yashiringan.
Mazkur holat yuzasidan To‘raqo‘rg‘on tuman IIB huzuridagi Tergov bo‘linmasi tomonidan nomaʼlum shaxsga nisbatan Jinoyat kodeksining 164-moddasi 3-qismi “v” bandi (bosqinchilik) bilan jinoyat ishi qo‘zg‘atilgan.
Olib borilgan tergov-tezkor harakatlari natijasida jabrlanuvchi B.M. o‘zining turmush o‘rtog‘i unga nisbatan beeʼtibor bo‘layotgani sababli uning eʼtiborini o‘ziga jalb qilish maqsadida, shu kuni xonadonida hech kim yo‘qligidan foydalanib, barcha xonalarini titib tashlab, birga yashovchi qaynonasi yotoqxonasidan 19,2 million so‘mlik tilla-taqinchoqlarini yashirib, bo‘yniga igna orqali shilinma tortgani aniqlangan. Shundan so‘ng, u go‘yoki yashash xonadoniga nomaʼlum shaxs g‘ayriqonuniy ravishda kirib, pichoq bilan o‘zi va chaqalog‘ini o‘ldirish bilan qo‘rqitib, tilla taqinchoqlarni olib ketgani haqida To‘raqo‘rg‘on tumani IIBga yolg‘on xabar bergan.
B.M.ning yashash xonadoni ko‘zdan kechirilganda o‘zi tomonidan yashirilgan tilla taqinchoqlar ashyoviy dalil sifatida xolislar ishtirokida rasmiylashtirib olingan.
Mazkur holat yuzasidan B.M. Jinoyat kodeksining 237-moddasi 2-qismi “g” bandi (o‘ta og‘ir jinoyat sodir etishda ayblab sodir etilgan yolg‘on xabar berish) bilan ayblanuvchi tariqasida ishda ishtirok etishga jalb qilinib, unga nisbatan garov ehtiyot chorasi qo‘llangan.
Jinoyat ishi ayblov xulosasi bilan tegishli sudlov organiga yuborish masalasini hal etish uchun To‘raqo‘rg‘on tuman prokuraturasiga yuborilgan.
Izoh (0)