Наманган вилояти Тўрақўрғон туманида 21 ёшли аёл турмуш ўртоғи унга эътибор бермаётгани учун жиноятга қўл урди, деб хабар беради ИИВ ҳузуридаги Тергов департаменти.
Қайд этилишича, 10 февраль куни Тўрақўрғон ИИБга 21 ёшли Б.М. қўнғироқ қилиб, номаълум шахс Тўрақўрғон тумани Ҳамроҳ кўчасида жойлашган хонадонига юзига ниқоб таққан ҳолда кириб, уни ва 1 ёшли қизини ўлдириш билан қўрқитиб, ҳаёт ва соғлик учун хавфли бўлган зўрлик ишлатгани тўғрисида мурожаат қилган. Аёлнинг сўзларига кўра, жиноятчи қўлида бўлган пичоқ билан унинг бўйин қисмига жароҳат етказиб, уйда бўлган 19,2 миллион сўмлик тилла-тақинчоқларини босқинчилик йўли билан қўлга киритиб, воқеа жойидан яширинган.
Мазкур ҳолат юзасидан Тўрақўрғон туман ИИБ ҳузуридаги Тергов бўлинмаси томонидан номаълум шахсга нисбатан Жиноят кодексининг 164-моддаси 3-қисми “в” банди (босқинчилик) билан жиноят иши қўзғатилган.
Олиб борилган тергов-тезкор ҳаракатлари натижасида жабрланувчи Б.М. ўзининг турмуш ўртоғи унга нисбатан бееътибор бўлаётгани сабабли унинг эътиборини ўзига жалб қилиш мақсадида, шу куни хонадонида ҳеч ким йўқлигидан фойдаланиб, барча хоналарини титиб ташлаб, бирга яшовчи қайнонаси ётоқхонасидан 19,2 миллион сўмлик тилла-тақинчоқларини яшириб, бўйнига игна орқали шилинма тортгани аниқланган. Шундан сўнг, у гўёки яшаш хонадонига номаълум шахс ғайриқонуний равишда кириб, пичоқ билан ўзи ва чақалоғини ўлдириш билан қўрқитиб, тилла тақинчоқларни олиб кетгани ҳақида Тўрақўрғон тумани ИИБга ёлғон хабар берган.
Б.М.нинг яшаш хонадони кўздан кечирилганда ўзи томонидан яширилган тилла тақинчоқлар ашёвий далил сифатида холислар иштирокида расмийлаштириб олинган.
Мазкур ҳолат юзасидан Б.М. Жиноят кодексининг 237-моддаси 2-қисми “г” банди (ўта оғир жиноят содир этишда айблаб содир этилган ёлғон хабар бериш) билан айбланувчи тариқасида ишда иштирок этишга жалб қилиниб, унга нисбатан гаров эҳтиёт чораси қўлланган.
Жиноят иши айблов хулосаси билан тегишли судлов органига юбориш масаласини ҳал этиш учун Тўрақўрғон туман прокуратурасига юборилган.
Изоҳ (0)