“Euronews.travel” nashri O‘zbekistonning xalqaro sayyohlar uchun tobora ochilib borayotgani to‘g‘risida maqola e’lon qildi. “Daryo” maqolaning tarjimasini taqdim etadi.
Bir paytlar sayyohlar uchun yopiq bo‘lgan O‘zbekiston hozirda xalqaro sayohatchilarni faol qabul qilmoqda. Xitoy, Yaqin Sharq va Yevropa o‘rtasidagi qadimiy savdo yo‘li bo‘lgan Ipak yo‘lining markazida joylashgan, dengizga chiqa olmagan mamlakat sayyohlarga qadimiy va zamonaviy davrlarning o‘ziga xos uyg‘unligini, shuningdek, ko‘plab eko va agroturizm imkoniyatlarini taklif etadi.
“O‘zbekistonning sayyohlik yo‘nalishi sifatida yuksalishi rahbariyat almashganidan boshlandi. Bizning yangi prezidentimiz mamlakatni liberallashtirdi, bu viza rejimi liberallashtirilganda, ayniqsa, turizm sohasida yaqqol namoyon bo‘ldi”, — deydi madaniyat va turizm vazirining birinchi o‘rinbosari Ulug‘bek A’zamov.
O‘zbekistonga borish uchun viza kerakmi?
Endilikda 93 davlat, jumladan, Yevropa Ittifoqiga a’zo barcha davlatlar va Buyuk Britaniya fuqarolari O‘zbekistonga vizasiz, 50 dan ortiq davlat esa elektron vizalar bilan tashrif buyurishi mumkin. Sayohat qoidalarining bunday yengillashuvi so‘nggi yillarda turizmning o‘sishini ko‘rsatdi, 2019-yilda tashrif buyuruvchilar soni 6,7 millionga yetdi. Pandemiya jahon miqyosida turizmni orqaga qaytardi, ammo bu yil O‘zbekiston pandemiyadan oldingi raqamlardan oshib ketishiga umid qilmoqda, bu bilan taxminan 7 million xalqaro sayyoh kutilmoqda.
Xoh zamonaviy poytaxt Toshkentning teatr va muzeylariga , xoh islomiy Buxoro shahrining qadimiy masjid va minoralariga tashrif buyurishni xohlaysizmi — mamlakat o‘ziga xos tarixga ega bo‘lib, yaqin vaqtgacha ko‘plab sayyohlar uchun buning imkoni yo‘q edi.
“Bizda hamisha shunday salohiyat bor edi. UNESCO butunjahon merosi obyektlari: Samarqand, Buxoro, Shahrisabz shaharlari mavjud, ammo shu paytgacha o‘z imkoniyatlarimizni ishga solmadik, endi bundan foydalanyapmiz”, – deydi Ulug‘bek A’zamov.
Samarqand haqida nimalarni bilish kerak?
Yaqin Sharq va Sharqiy Osiyo o‘rtasida joylashgani sababli “Madaniyatlar chorrahasi” sifatida tanilgan Samarqand shahri o‘zbek sarguzashtlarini boshlash uchun eng zo‘r manzil. Bu Markaziy Osiyodagi eng qadimiy doimiy aholi yashaydigan shaharlardan biri bo‘lib, uning ildizlari miloddan avvalgi 6-asrga borib taqaladi. Islom dunyosidagi eng e’tirof etilgan majmualardan biri hisoblangan Registon ansambli joylashgan shahar O‘zbekistonga kirish eshigi hisoblanadi.
O‘zbekistonning qog‘oz ishlab chiqarish an’analari
O‘zbekiston Xitoy askarlari bosqinidan qog‘oz yasash sirlarini o‘rgangach, 8-asrdan beri o‘z qog‘ozchilik sohasini rivojlantirib kelmoqda.
Hikoya Samarqand hukmdori bosqinchi Xitoy qo‘shinlarini mag‘lubiyatga uchratganidan boshlanadi. Bu paytda ko‘plab xitoylik askarlar asirga olingani aytiladi. Asirlar o‘zini qutqarish uchun qog‘oz ishlab chiqarish sirlarini o‘rgatgan va shundan so‘ng Samarqand bu qadimiy hunarmandchilik markaziga aylangan.
Samarqandda qog‘oz ishlab chiqarish an’anasi ko‘p asrlar davomida yo‘qotildi, faqatgina 20-asrga kelib bu qayta tiklandi va endi siz shahardagi Meros qog‘oz fabrikasiga tashrif buyurishingiz mumkin.
Buxoro: Islom dunyosining qadimiy shahriga sayohat qiling
O‘zbekistonning eng qadimiy shaharlaridan biri bo‘lgan Buxoro 2500 yildan ortiq tarixga ega bo‘lib, mamlakatdagi islom madaniyatining markazi hisoblanadi. Masjidlar, madrasalar va Minorai Kalon ming yildan ortiq tarixga ega.
Mahalliy diqqatga sazovor joylar orasida dunyodagi eng qadimiy hammomlardan biri bo‘lgan Hammam Bozori Kord uzoq kunlik sayrdan keyin dam olish uchun ajoyib joy hisoblanadi.
Ugom-Chotqol milliy bog‘i: tabiat qo‘ynida qor qoplonlari va qizil tulkilarni tomosha qiling
O‘zbekistonda sayyohlik va reyslar soni ortib borayotgan bir paytda, mamlakat o‘zining ekoturizm salohiyatini ham rivojlantirmoqchi. Mamlakatning uzoq shimoli-sharqida joylashgan Ugom-Chotqol milliy bog‘i sayyohlar tashrif buyurishi shart bo‘lgan manzil hisoblanadi, u yerda noyob flora va fauna hamda sutemizuvchilar, jumladan, qor qoplonlari va qizil tulkilar yashaydi.
Chotqol tog‘i atrofidagi hudud UNESCO biosfera rezervati hisoblanadi va bu yerda miloddan avvalgi 1000—2000-yillarga oid qadimiy chizmalarni ham topishingiz mumkin.
Gastroturizm: O‘zbekiston milliy oshxonasi ko‘plab mazali taomlarga ega
Hudud madaniyatini bilmoqchi bo‘lsangiz, albatta, taomlarini tatib ko‘ring. O‘zbekistonda bu ko‘mirda pishirilgan go‘sht, tandir kabob, palov va quritilgan mevalar, yong‘oqlarning keng tanlovini anglatadi.
An’anaviy o‘zbek patirlarini ham tatib ko‘ring, masalan, loydan yasalgan tandirda pishirilgan yumaloq nonning ta’mi sizda o‘zgacha taassurot qoldiradi.
Mintaqada vino ishlab chiqarish uzoq yillardan beri mavjud bo‘lib, Samarqand va Toshkent atrofida sayyohlar tashrif buyurishi mumkin bo‘lgan bir qator vino zavodlari mavjud.
Izoh (0)