Sog‘liqni saqlash vaziri Amrillo Inoyatov rahbarligida 11-mart kuni vazirlikning navbatdan tashqari hay’at yig‘ilishi bo‘lib o‘tdi. Bu haqda vazirlik axborot xizmati xabar berdi.
Majlisda qayd etilishicha, sohada byurokratik to‘siqlar hali ham uchramoqda. Aholini sifatli dori-darmon vositalari, tibbiy buyum va jihozlar bilan ta’minlash, tizimda ijro intizomini nazorat qilish borasida qator muammolar mavjud.
Shuningdek, sog‘liqni saqlash yo‘nalishida xalqaro investisiyalar jalb qilinishini muvofiqlashtirish, bolalar tibbiyotida ilg‘or davolash usullarini amaliyotga tatbiq etish bo‘yicha ishlar ham yetarli darajada tashkil qilinmayotgani ma’lum qilindi.
Yig‘ilishda berilgan topshiriq va vazifalar hamda qo‘yilgan talablarni o‘z vaqtida bajarmagani sababli “O‘zmedimpeks” MCHJ direktori A.Nabiyev, Bolalar milliy tibbiyot markazi direktori vazifasini vaqtincha bajaruvchi Alisher Sharipov egallab turgan lavozimidan ozod qilindi.
Shuningdek, o‘z yo‘nalishida yetarli natija ko‘rsata olmagani bois vazirlikning Dori vositalari va tibbiy buyumlar va jihozlar muomalasini tartibga solish va muruvvat yordamini muvofiqlashtirish boshqarmasi boshlig‘i X.G‘aniyeva hamda yana bir qator mas’ullar ham ishdan olingani ma’lum qilindi.
Yig‘ilishda vazir Amrillo Inoyatov tibbiyot tizimidagi har bir rahbar o‘z vazifasiga vijdonan yondashishi kerakligini ta’kidlab, bugungi kun talabidan kelib chiqqan holda soha oldida turgan dolzarb masalalarga to‘xtalib o‘tgan.
Izoh (0)