Зоир Мирзаев 8 март байрамига 180 нафар хотин-қизга қуёшли панел совға қилиб, хонадонига бепул ўрнатиб берди

Тошкент вилояти ҳокими Зоир Мирзаев 8 март — Халқаро хотин-қизлар куни муносабати билан вилоятда ижтимоий оғир аҳволга тушиб қолган, ногиронлиги бўлган хотин-қизлар яшовчи 180 та хонадонга қуёшли панеллар совға қилди. Бу ҳақда “Дарё”га вилоят ҳокимлиги ахборот хизмати хабар берди.

Маълум қилинишича, президентнинг 2023 йил 16 февралдаги қарорига асосан 2023 йил Тошкент вилоятида 1420 та ижтимоий соҳа объекти ва давлат идораси, 5167 та аҳоли хонадони, 604 та тадбиркорлик субъектига қуёшли панеллар ўрнатиш, маҳаллий тадбиркорлар томонидан умумий қуввати 24,3 мВт бўлган кичик ФЭСлар қурилиши амалга оширилади. Ҳудудда 12 та кичик ГЭСлар қуриш, 72 та кўп қаватли уйга қуёш панеллари ўрнатиш, 74 та ғишт ишлаб чиқарувчи корхона ҳамда 1305 та ижтимоий соҳа объекти, 59 та иссиқхонани кўмирга ўтказиш режалаштирилган.

“Ўтган давр мобайнида 73 та ижтимоий соҳа (27 та мактаб, 19 та мактабгача таълим ташкилоти) объекти, 16 та соғлиқни сақлаш муассасаси, 11 та бошқа бинога, 164 та давлат идоралари (23 та ҳокимлик бинолари, 66 та банк, 12 та бошқармалар, 63 та бошқа) биноларига қуёш панеллари ўрнатилди. Аҳоли хонадонларининг 404 тасига қуёш панеллари ҳамда 2,2 минг литр қуёш сув иситиш ускуналари ўрнатилди. 

“8 март байрами муносабати билан ‘Темир дафтар’ ва ‘Аёллар дафтари’га кирган 180 нафар хотин-қиз яшовчи хонадонга маҳаллий бюджет ҳисобидан, 224 та хонадонга ўз ҳисоби ва банк кредитлари ҳисобидан қуёшли панеллар ўрнатилди”, — дейди вилоят ҳокимлиги ахборот хизмати раҳбари Беҳзод Қобулов.

Таъкидланишича, қарор ижросини таъминлаш мақсадида кам таъминланган хонадонларга қуёш панелларини ўрнатиб бериш учун вилоят маҳаллий бюджетидан 3 миллиард сўм маблағ ажратилган.

“Ушбу маблағ ҳисобидан шаҳар ва туманларда ҳар бир сектордан кам таъминланган ва дафтарларга киритилган 2 тадан хонадонга қуёш панеллари ёки қуёш сув иситиш ускуналари ўрнатиб берилади. Кўмир ёқилғисига ўтказиладиган 1305 та ижтимоий соҳа объекти (424 та МТМ, 694 та мактаб, 187 та соғлиқни сақлаш)га лойиҳа институтлари бириктирилди. 113 тасида лойиҳалаш ишлари тугалланди. Ҳомийлар ва бюджетдан ажратилган 12,3 миллиард сўм маблағ ҳисобидан ҳозиргача 59 тасида қозонлар ўрнатилди”, — дейди масъуллар.

Қўшимча қилинишича, ҳозиргача газда ишловчи 59 та иссиқхонадан 21 таси тўлиқ кўмир ёқилғисига ўтказилган. 38 тасида кўмирда ишловчи қозонлар ўрнатилиши бошланган. 74 та ғишт завод тўлиқ хатловлан ўтказилиб, барчаси табиий газ тармоғидан узилган. 60 таси тўлиқ кўмирга ўтказилган. 14 тасида кўмирда ишлашга мослаштириш ишлари олиб борилмоқда.

“Вилоятда 900 МВт қувватлик фотоэлектр станцияларини қуриш бўйича Корея давлатининг Chung Dahm Power Corporation ва Хитой Халқ Республикасининг Anhui Conch New Energy Co., Ltd компаниялари билан келишувга эришилди. Бундан ташқари, Юқори Чирчиқ туманида Саудия Арабистони Akva Pover компанияси билан хамкорликда қуввати 400 МВт бўлган қуёш фотоэлектр станцияларини қуриш ишлари бошланди”, — дейди Беҳзод Қобулов.