Қирғизистон пиёз экспортига қўйилган тақиқни муддатидан олдин бекор қилди

Қирғизистон Марказий Осиёда пиёз экспортига қўйилган тақиқни муддатидан олдин бекор қилган биринчи давлат бўлди. Бу ҳақда EastFruit хабар бермоқда. 

Экспертларнинг таъкидлашича, жорий йилнинг январь ойи охирида ушбу мамлакат ҳукумати томонидан тадбиқ қилинган пиёз экспортига вақтинчалик чеклов кутилган уч ой ўрнига бир ойдан сал кўпроқ вақт давомида амал қилди.

Қирғизистон Қишлоқ хўжалиги вазирлиги 3 мартдан бошлаб пиёз экспортига қўйилган вақтинчалик чеклов бекор қилингани ҳақида маълум қилган. 

Қозоғистон, Ўзбекистон ва Тожикистондан сўнг 2023 йил январь ойи охирида Қирғизистон ҳам 2023 йилнинг 31 январидан 30 апрелигача пиёз экспортига вақтинчалик чеклов жорий қилган эди. 

Бундай чоранинг қабул қилиниши озиқ-овқат хавфсизлигини таъминлаш ва ижтимоий аҳамиятга эга озиқ-овқат маҳсулотлари, шунингдек, пиёзнинг барча турларини ўз ичига олган нархларни ушлаб туриш зарурлиги билан изоҳланди.

Бироқ, 2023 йил февраль ойининг иккинчи ярмида мамлакат ҳукумати пиёз экспортига ўрнатилган чекловни олиб ташлашга тайёргарлик кўришни бошлади.

“Қишлоқ хўжалиги бошқармаси Қирғизистонда пиёз етиштирувчи фуқаролар ва ташкилотларнинг талабларини қондирди. Уларнинг фикрича, мамлакатда ички бозордаги талабни қондириш учун етарли маҳсулотлар мавжуд.

Бугунги кунда Қирғизистон аҳолисининг пиёзга бўлган эҳтиёжи ойига 6 минг тоннани ташкил этади. Айни пайтда фермерларда 50 минг тоннага яқин заҳира мавжуд, бу эса, ўз навбатида, аҳолининг 2-2,5 ойлик эҳтиёжини қоплайди”, — деб ёзади “Ekonomist.kg”.

Шундай қилиб, 2023 йил январь ойи охирида жорий этилган Қирғизистондан пиёз экспор қилишни тақиқлаш амалда, 2023 йилнинг 31 январидан 3 мартигача амал қилган. Бу эса атиги 32 кун дегани. 

Қирғизистон Марказий Осиёда биринчилардан бўлиб пиёз экспортига қўйилган вақтинчалик чекловни муддатидан олдин бекор қилди.

Аввалроқ Қозоғистонда фермерлар ҳукуматни пиёз экспортига тақиқни бекор қилишга чақираётгани ҳақида хабар берилган эди.