Украина Қуролли кучлари АҚШ ва Германия ваъда қилган иккита Патриот ҳаво ҳужумидан мудофаа тизимларининг биринчисини олди, деб ёзмоқда The Financial Times. Нашр маълумотларига кўра, қабул қилинган комплексдан фойдаланиш ҳали бошланмаган.
Нашрнинг аниқлик киритишича, Украина Нидерландиядан ҳам бир нечта Патриот ракета тизимлари етказиб берилишини кутмоқда.
Патриот Украинага келтирилгани ҳақида аввал Польша мудофаа вазири Мариуш Блашак маълум қилганди, бироқ кейинроқ Польша Мудофаа вазирлиги Блашакнинг сўзлари нотўғри талқин қилингани ҳақида баёнот берди. Вазирликнинг тушунтиришича, Блашак Польшанинг саъй-ҳаракатлари туфайли комплексларни Украинага етказиб беришга қарор қилинганини назарда тутган.
2022 йилнинг кузидан бери Россия мунтазам равишда Украинанинг энергетика инфратузилмаси объектларига кенг кўламли зарбалар бермоқда. Шу муносабат билан Украина расмийлари Украинани ҳаво ҳужумидан мудофаа тизимлари билан таъминлаш зарурлигини бир неча бор таъкидлаган.
2023 йил февралида Франция ва Италия SAМP-Т-Мамба ўрта масофага мўлжалланган зенит-ракета комплексларини Киевга топширишга ваъда берди. Октябрь ойида Германия Украинага тўртта IRIS-Т SLМ ҳаво мудофаа тизимидан биринчисини топширганди. Сентябрь ойи охирида Украина АҚШдан NASAMS ҳаво мудофаа тизимларини олган.
Изоҳ (0)