Samarqand shahrida 14 yoshli qizni aldab olib qochgan erkak ushlandi. Bu haqda viloyat Ichki ishlar boshqarmasi axborot xizmati xabar berdi.
Xabarga ko‘ra, holat 8-mart kuni soat taxminan 8:00 larda sodir bo‘lgan. 1985-yilda tug‘ilgan fuqaro S.U. mast holda oq rangli Nexia-3 bilan Samarqand shahar Dahbed ko‘chasidagi o‘quv markazi oldida turgan 2009-yilda tug‘ilgan qizga o‘zini kirakash deb tanishtirib, uni uyiga olib borishini aytgan va aldab o‘tirg‘izgan. Shundan so‘ng uyiga olib bormasdan, mashinani boshqa tomonga boshqarib ketgan.
Voyaga yetmagan qiz mashinadan tushib qolmoqchi bo‘lganda u mashina eshiklarini qulflab qo‘ygan va Oqdaryo tumani “Boshdarxon” MFY, Yangiobod qishlog‘igacha boshqarib borgan. Avtomashina shinasi bosimi chiqib ketgani sababli mashinadan tushib, g‘ildiraklariga qarayotgan vaqtida qiz mashinadan tushib, qochib ketgan va shu yerda bo‘lgan fuqarolardan yordam so‘ragan.
Maʼlum qilinishicha, holat yuzasidan qizning yaqinlari huquqni muhofaza qilish organlariga ariza bilan murojaat qilgan.
Huquqni muhofaza qilish organlari tomonidan olib borilgan tezkor tadbirlar natijasida S.U. qo‘lga olinib, unga nisbatan Jinoyat kodeksining 137-moddasi (odam o‘g‘irlash) 2-qismi “a” bandi bilan jinoyat ishi qo‘zg‘atilib, gumonlanuvchi protsessual tartibda qamoqqa olingan.
Avvalroq O‘zbekistonda ayollar va bolalar huquqlarini buzganlik uchun jazoni kuchaytirish bo‘yicha qonun loyihasi deputatlar tomonidan qabul qilingan edi. Mazkur qonun loyihasi xotin-qizlar va bolalarning tazyiq hamda zo‘ravonlikka uchrashining oldini olish, oila institutini mustahkamlash, oilalardagi ma’naviy-axloqiy muhitni yaxshilash va ajrimlar sonining kamayishiga, bolalar va xotin-qizlar huquqlariga oid xalqaro indekslarda O‘zbekistonning o‘rnini yaxshilashga xizmat qiladi.
Ta’kidlash kerakki, mazkur yo‘nalishdagi ishlar 2022-yilning iyunida boshlangan edi. O‘shanda ijtimoiy tarmoqlarda to‘y kuni o‘yinda yutqazib qo‘ygan kuyov kelinni urgani aks etgan videolavha tarqalgandi. Keyinroq mazkur to‘y marosimi Surxondaryoda bo‘lgani va kelinni urgan kuyov javobgarlikka tortilgani to‘g‘risida ma’lum bo‘ldi. Oliy Majlis Senati Xotin-qizlar va gender tenglik masalalari qo‘mitasi mazkur holatni keskin qoralab chiqqandi.
15-iyun kuni esa Oliy Majlis Senatida Xotin-qizlar va bolalarning huquqlari, erkinliklari hamda qonuniy manfaatlarini ishonchli himoya qilishga qaratilgan qonunchilikni takomillashtirish masalalari yuzasidan tuzilgan ishchi guruhning navbatdagi yig‘ilishi bo‘lib o‘tgandi.
Izoh (0)