Jurnalist va shoir Akmal Toshevning o‘limi yuzasidan tergovga qadar tekshiruv harakatlari boshlandi. Bu haqda Bosh prokuratura axborot xizmati xabar berdi.
“2023-yil 8-mart kuni 37 yoshli jurnalist Akmal Toshev vafot etgani yuzasidan Bektemir tumani prokuraturasi tomonidan tergovga qadar tekshiruv harakatlari o‘tkazilmoqda. Sud-tibbiyot ekspertizasining dastlabki xulosasiga ko‘ra, A.Toshevning o‘limi yurak tamponadasi, o‘pka arteriyasi anevrizmasining yorilishi, yurak tug‘ma nuqsoni, yurak bo‘lmachalari defektidan kelib chiqqan”, — deyiladi Bosh prokuratura axborot xizmati tarqatgan rasmiy maʼlumotda.
Avvalroq jurnalistning o‘limi haqida gapirgan hamkasbi Asliddin Alimardonov “Daryo” muxbiri bilan suhbatida “Kecha yangi sotib olgan uyining taʼmiri uchun ustalarga qurilish materiallari olib berib, qaytayotganda ko‘chada yuragi bezovta qilgan deyishdi. Tez yordam yetib kelgunga qadar joni uzilgan ekan”, — degandi.
Izoh (0)