Самарқанд шаҳрида 14 ёшли қизни алдаб олиб қочган эркак ушланди. Бу ҳақда вилоят Ички ишлар бошқармаси ахборот хизмати хабар берди.
Хабарга кўра, ҳолат 8 март куни соат тахминан 8:00 ларда содир бўлган. 1985 йилда туғилган фуқаро С.У. маст ҳолда оқ рангли Nexia-3 билан Самарқанд шаҳар Даҳбед кўчасидаги ўқув маркази олдида турган 2009 йилда туғилган қизга ўзини киракаш деб таништириб, уни уйига олиб боришини айтган ва алдаб ўтирғизган. Шундан сўнг уйига олиб бормасдан, машинани бошқа томонга бошқариб кетган.
Вояга етмаган қиз машинадан тушиб қолмоқчи бўлганда у машина эшикларини қулфлаб қўйган ва Оқдарё тумани “Бошдархон” МФЙ, Янгиобод қишлоғигача бошқариб борган. Автомашина шинаси босими чиқиб кетгани сабабли машинадан тушиб, ғилдиракларига қараётган вақтида қиз машинадан тушиб, қочиб кетган ва шу ерда бўлган фуқаролардан ёрдам сўраган.
Маълум қилинишича, ҳолат юзасидан қизнинг яқинлари ҳуқуқни муҳофаза қилиш органларига ариза билан мурожаат қилган.
Ҳуқуқни муҳофаза қилиш органлари томонидан олиб борилган тезкор тадбирлар натижасида С.У. қўлга олиниб, унга нисбатан Жиноят кодексининг 137-моддаси (одам ўғирлаш) 2-қисми “а” банди билан жиноят иши қўзғатилиб, гумонланувчи процессуал тартибда қамоққа олинган.
Аввалроқ Ўзбекистонда аёллар ва болалар ҳуқуқларини бузганлик учун жазони кучайтириш бўйича қонун лойиҳаси депутатлар томонидан қабул қилинган эди. Мазкур қонун лойиҳаси хотин-қизлар ва болаларнинг тазйиқ ҳамда зўравонликка учрашининг олдини олиш, оила институтини мустаҳкамлаш, оилалардаги маънавий-ахлоқий муҳитни яхшилаш ва ажримлар сонининг камайишига, болалар ва хотин-қизлар ҳуқуқларига оид халқаро индексларда Ўзбекистоннинг ўрнини яхшилашга хизмат қилади.
Таъкидлаш керакки, мазкур йўналишдаги ишлар 2022 йилнинг июнида бошланган эди. Ўшанда ижтимоий тармоқларда тўй куни ўйинда ютқазиб қўйган куёв келинни ургани акс этган видеолавҳа тарқалганди. Кейинроқ мазкур тўй маросими Сурхондарёда бўлгани ва келинни урган куёв жавобгарликка тортилгани тўғрисида маълум бўлди. Олий Мажлис Сенати Хотин-қизлар ва гендер тенглик масалалари қўмитаси мазкур ҳолатни кескин қоралаб чиққанди.
15 июнь куни эса Олий Мажлис Сенатида Хотин-қизлар ва болаларнинг ҳуқуқлари, эркинликлари ҳамда қонуний манфаатларини ишончли ҳимоя қилишга қаратилган қонунчиликни такомиллаштириш масалалари юзасидан тузилган ишчи гуруҳнинг навбатдаги йиғилиши бўлиб ўтганди.
Изоҳ (0)