O‘zbekistonda saylash huquqi cheklangan shaxslar ro‘yxati bo‘lmaydi

O‘zbekistonda endilikda saylash huquqi cheklangan shaxslar ro‘yxati bo‘lmaydi.

Konstitutsiyaga kiritilayotgan taklifga muvofiq, endilikda qonunlarda saylash huquqi cheklangan shaxslar ro‘yxati bo‘lmaydi. Faqatgina sud tomonidan muomalaga layoqatsiz deb topilgan fuqarolar, shuningdek og‘ir va o‘ta og‘ir jinoyatlar sodir etganlik uchun sudning hukmiga ko‘ra ozodlikdan mahrum etish joylarida saqlanayotgan shaxslar saylovda ishtirok etish huquqidan faqat qonunga muvofiq hamda sudning qarori asosida mahrum etilishi mumkin.

Shuningdek, davlat ramzlari – millat timsoli ekanligidan kelib chiqib, ularga nisbatan hurmat tuyg‘usini kuchaytirish va ularni himoya qilish maqsadida “davlat ramzlari davlat himoyasidadir” degan konstitutsiyaviy norma o‘rnatilmoqda.

Bundan tashqari, milliy valyutaga bag‘ishlangan yangi modda kiritilib, unda O‘zbekistonning pul birligi so‘m ekani, so‘m mamlakatning butun hududida yagona cheklanmagan qonuniy to‘lov vositasi ekani ko‘rsatilmoqda.

Avvalroq Shavkat Mirziyoyev deputatlar bilan uchrashuvda siyosiy partiyalarning rolini oshirish maqsadida aralash saylov tizimiga o‘tish taklifini bildirgani xabar qilingandi.