Toshkent shahar Shayxontohur tumanida diniy mutaassiblikni targ‘ib qilgan 20 yoshli qizga chora ko‘rildi. Bu haqda Ichki ishlar vazirligi axborot xizmati xabar qildi.
Xabarga ko‘ra, 2023-yilning fevral oyida ijtimoiy tarmoqlarda arab davlatlarida keng tarqalgan burqa kiygan nomaʼlum ayolning “Ayollarб ehtiyot bo‘ling” nomli videolavhasi tarqaldi. Unda ayollarning tashqi ko‘rinishi tanqidga olingani aks etgan.
Ushbu holat yuzasidan o‘tkazilgan o‘rganishlar davomida mazkur videorolik muallifi 2003-yilda Toshkent shahrida tug‘ilgan, poytaxtdagi oliy taʼlim muassasalarining birida tahsil oluvchi fuqaro Q.Sh. ekani aniqlandi va 2-mart kuni Shayxontohur tumani IIO FMBga taklif etildi.
Suhbat davomida fuqaro ijtimoiy tarmoqda ayollarning tashqi ko‘rinishiga oid munosabatini shaxsiy diniy qarashlaridan kelib chiqqan holda xorijiy saytlarning biridan olingan materiallar asosida bildirganini, hozirgi kunda uy sharoitida videolavhada ko‘rsatilgan noanʼanaviy ayollar liboslarini (burqa) tikish va aholiga sotish bilan shug‘ullanishini maʼlum qildi.
Keltirilishicha, “Xotin-qizlar va erkaklar uchun teng huquq hamda imkoniyatlar kafolatlari to‘g‘risida”gi qonunga asosan jins bo‘yicha bilvosita kamsitish, yaʼni bir jinsdagi shaxslarni boshqa jinsdagi shaxslarga nisbatan noqulayroq holatga tushirib qo‘yadigan vaziyatlarni, holatlarni yoki mezonlarni yaratish, shu jumladanб gender tengsizlikni ommaviy axborot vositalari, taʼlim, madaniyat orqali targ‘ib etish, muayyan jinsdagi shaxslar uchun salbiy oqibatlarga olib kelishi mumkin bo‘lgan shart-sharoitlar yoxud talablar belgilanishiga yo‘l qo‘yilmaydi. Ushbu qonunning 29-moddasida xotin-qizlar va erkaklar uchun teng huquq hamda imkoniyatlar kafolatlari to‘g‘risidagi qonunchilikni buzganlik uchun javobgarlik belgilangan.
“Vijdon erkinligi va diniy tashkilotlar to‘g‘risida”gi qonunning 10-moddasiga binoan mamlakat hududida diniy mazmundagi materiallarni tayyorlash va tarqatish dinshunoslik ekspertizasining ijobiy xulosasi olinganidan keyin amalga oshiriladi. Ushbu qonunning 5-moddasiga ko‘ra, mamlakatda vijdon erkinligini taʼminlashning asosiy ustuvorliklaridan biri sifatida jamoat tartibiga, fuqarolarning sog‘lig‘i va axloqiga, huquq va erkinliklariga tahdid soluvchi diniy g‘oyalar hamda qarashlarning singdirilishi va tarqatilishiga qarshi kurashish belgilab qo‘yilgan.
Shu munosabat bilan sud idoralari tomonidan fuqaro Q.Sh.ga nisbatan Maʼmuriy javobgarlik to‘g‘risidagi kodeksning 1842-moddasi (diniy mazmundagi materiallarni qonunga xilof ravishda tayyorlash, saqlash, olib kirish yoki tarqatish) bilan bazaviy hisoblash miqdorining 50 barobari miqdorida jarima jazosi tayinlandi.
Avvalroq Farg‘onada muqaddam sudlanib, 18 yil qamoq jazosini o‘tab chiqqan shaxs vayronkor g‘oyalarga yo‘g‘rilgan nashidalarni tinglab, tarqatib kelgani uchun yana sudlangani haqida xabar berilgandi.
Shuningdek, Toshkentda tanishiga nashida yuborgani uchun qamalgan talaba yigit ozod qilingani to‘g‘risida xabar berilgandi.
Izoh (0)