Vladimir Klichko nomi professional boks shonli tarixiga o‘chmas harflar bilan yozilgan. Ukrainalik bokschi uzoq yillar mobaynida super og‘ir vazn toifasining dominant chempioni bo‘lib kelgan va sport jamoatchiligining hurmatiga erishgan. Biroq kichik Klichko faoliyatida ham kutilmagan holatlar sodir bo‘lgan. Ayniqsa 2003 va 2004-yillarda Vladimirga oson bo‘lmagan. Hammasi Klichkoning 2003-yil 8-mart kuni bo‘lib o‘tgan Korri Sandersga qarshi jangidan keyin boshlangandi.
Yil apseti
37 yoshli bokschi faoliyatining so‘nggi yillarini o‘tkazayotgan edi. Sanders faoliyatining eng yuqori bosqichini 2000-yillar arafasida bosib o‘tgandi. Asr boshida Hasim Rahmonga yutqazib qo‘ygan va jahon darajasidagi yulduz maqomiga erishish imkoniyatini qo‘ldan chiqargandi. O‘sha to‘qnashuvdan keyin Korri bor-yo‘g‘i ikkita jang o‘tkazgan va unda ham o‘rtamiyonalarni yenggandi.
Biroq kutilmaganda unga WBO toifasining yosh chempioni Vladimir Klichkoga qarshi jang qilish taklifi beriladi. Bunga qadar 26 yoshli Klichko o‘z kamarini besh bor himoya qilishga muvaffaq bo‘lgandi. Qayd etish kerak, o‘sha vaqtlari Vladimir faoliyatining so‘nggi vaqtlaridan farqli o‘laroq, tez-tez jang qilib turardi. Beshta himoya jangini 20 oyda o‘tkazgani bunga isbot. Sandersga qarshi jang uning uchun oxirgi ikki yil ichidagi oltinchi himoya jangi edi.
Vladimir avvalgi besh jangini muddatidan avval g‘alaba bilan yakunlagan va bunisi ham ukrainalik uchun “engil tushlik” bo‘lishi kutilgandi. Umuman olganda ekspertlar ham, bukmekerlar ham, muxlislar ham Klichkoni yaqqol favorit hisoblagandi. O‘sha vaqtda JAR vakilining g‘alabasiga o‘zi va jamoasidan boshqa hech kim ishonmayotgandi.
Dastlabki raund an’anaga ko‘ra kuzatuv bilan boshlandi. Birinchi daqiqa tugayotgan vaqtda Klichko o‘zining tashrif qog‘oziga aylangan jeblarni yo‘llashni boshlaydi. Ikkinchi daqiqada o‘tib borayotganda esa Sanders o‘zining asosiy qurolini namoyish qiladi — chap qo‘l zarbasi. Korrining zarbasi o‘tdi va raqibni muvozanatdan chiqarayozdi. Vladimir klinchda jon saqlashga harakat qildi, biroq Korri uni turtib yuboraverdi. Ukrainalik raqibini shashtini pasaytirish uchun qarshi zarba yo‘llashga urindi. Biroq Sanders shuni kutgandek ustunlikni yanada oshirdi. Masofani yaqinlashtirgan Korri chap tomondan kuchli huk zarbasini yo‘lladi. Vladimir bu zarbadan keyin ringga yiqildi. Turishga juda qiynaldi. “Snayper” qon isini sezdi va referining jangni davom ettirish buyrug‘idan keyin yana oldinga tashlandi. Klassik ikkilik zarba va Klichko yana nokdaun holatida. Vladimir bu safar ham oyoqqa turishga kuch topa oldi va bong chalindi.
Ikkinchi raund boshida chempion negadir zarbalar almashinuviga kirib ketdi. Korridan yana bir chap qo‘l zarbasini qabul qildi va nokdaun holatiga tushdi. Klichko turdi, biroq raqibining keyingi hujumidan keyin yana yiqildi. Sanders qattiq zarbalari bilan raqibini to‘rtinchi marta yiqitdi va shundan keyin referi jangni to‘xtatdi.
Jang bor-yo‘g‘i 207 soniya davom etdi va yil apseti sifatida e’tirof etildi. Aynan shu jangdan keyin kichik Klichkoni “billur jag‘” deb atay boshlashdi. JARdan bo‘lgan “Snayper” haqiqatda kuchli zarbaga ega bo‘lgani haqida juda kamchilik qayd etadi.
Klichkoning o‘zi bu mag‘lubiyatining sababini xotirjamlikka berilish va raqibga yetarli baho bermaslik bilan tushuntiradi.
O‘shanda Sandersga nima uchun yutqazganimni bilaman. O‘sha vaqtga kelib janglarga to‘yib ketgandim. Jangdan bosh torta olmasdim, chunki shartnoma bor edi, promouter shuni istagandi. O‘sha vaqtni eslayman, ringga chiqar ekanman ta’til haqida o‘ylardim: hozir uni birinchi raunddayoq biryoqlik qilaman va dam olgani ketaman. Ya’ni jang boshlanmasidan oldin boy berib bo‘lingandi. U kabi portlovchi zarbaga ega jangchiga qarshi bellashuv oldidan bunday o‘ylash o‘zingni ko‘mishga teng edi, — eslaydi Vladimir.
Qasos
Ushbu mag‘lubiyat aka-uka Klichkolarning kichigi faoliyatiga yaxshigina zarba bo‘ldi. Shu vaqtda Vitaliy Klichko oila nufuzini tiklashni o‘z zimmasiga oldi. Sanders keyingi jangini Klichkolarning kattasiga qarshi o‘tkazdi.
O‘sha vaqtda sobiq mutlaq chempion Lennoks Lyuis ukrainalik bokschiga qarshi revansh jangi uchun qaytmasligi ma’lum bo‘lib ulgirgardi. Shu tariqa WBC kamari vakant qoladi, Vitaliy esa bu kamarga majburiy da’vogar edi. Sanders Vitaliyga qarshi jangda ishtirok etish uchun WBO titulini himoya qilishdan bosh tortgan va undan ayrilgandi.
Katta Klichko ushbu jangda favorit sifatida ko‘riladi, biroq o‘tgan jangdagi g‘alaba bois Sandersning yana sensatsiya qayd etish ehtimolini hech kim inkor etmasdi. Bundan tashqari Vitaliyning kayfiyati ham yaxshi emasdi, sabab bu jangdan ikki hafta oldin Vladimir yana nokaut bilan yutqazgandi. Shundan keyin barcha Vladimirni hisobdan chiqargan va bu akaga yanada ko‘proq mas’uliyat yuklardi.
Vaziyatni inobatga olgan Klichko jangni katta g‘ayrat bilan boshladi. Sanders esa bundan avvalgi jangda foyda keltirgan taktikani qo‘llaydi. Birinchi raundda JAR vakili bir necha bor chap qo‘l zarbasini o‘tkaza oldi. Raund so‘ngida Korrining navbatdagi zarbasi Vitaliyni chayqatdi, biroq ukrainalik oyoqda tura oldi. Ikkinchi raundda Sanders yana voqealar rivojini tezlashtirishga harakat qildi, quvvati uzoq vaqtga yetmasligini anglar va shu bois muddatidan avval g‘alaba qayd etishga urinardi. Biroq Klichko yiqilmadi va uchinchi raunddan boshlab ustunlikni o‘z qo‘liga ola boshladi. Oltinchi raunddan keyin jang to‘liq Ukraina vakili tomoniga o‘tdi. Vitaliy raqibiga istalgan uslubda zarba berar, Sanders ularga deyarli javob qaytara olmasdi. Natijada referi sakkizinchi raund yakunlanishi arafasida jangni to‘xatib, texnik nokaut qayd etdi.
Vitaliy chiroyli g‘alaba qayd etgan holda super og‘ir vazn toifasida WBC kamarini qo‘lga kiritdi. Uni tabriklash uchun ringga yugurib chiqqanlardan biri Vladimir edi. Shu tariqa qasos olingandi.
Fojiali yakun
Vitaliyga qarshi jangdan keyin Sanders keyingi to‘rt yil mobaynida yana to‘rtta jang o‘tkazdi. 2008-yilda taniqli bo‘lmagan vatandoshiga yutqazganidan keyin faoliyatini yakunlaganini ma’lum qildi.
2012-yilda fojia sodir bo‘ladi. Pretoriyadagi restoranlarning birida qarindoshining tug‘ilgan kunini nishonlayotgan Sanders qurolli o‘g‘rilar qurboniga aylanadi. Jinoyatchilardan qizini himoya qilishga uringan Korri og‘ir yaralanadi va voqeaning ertasi kuni shifoxonada vafot etadi. O‘shanda sobiq chempion 46 yoshda edi. Jinoyatchilar qo‘lga tushadi va ularga nisbatan 43 yil ozodlikdan mahrum etish jazosi qo‘llaniladi.
Izoh (0)