Futbol bo‘yicha Indoneziya chempionatining 11-turidan o‘rin olgan “Arema” va “Persebaya” klublari o‘rtasidagi o‘yinda 2022-yil 2-oktabr sanasida bo‘lib o‘tdi.
Uchrashuv “Persebaya”ning 3:2 hisobidagi g‘alabasi bilan yakunlandi. Mag‘lubiyatdan hafsalasi pir bo‘lgan “Arema” muxlislari maydonga yugirib chiqib, g‘alayon ko‘targan. Muxlislar xavfsizlik xizmati vakillariga qarata turli buyumlarni uloqtirgan, bunga politsiya “dubinka” va ko‘zdan yosh oqizuvchi gazdan foydalanish bilan javob bergan. Oqibatda 174 kishi halok bo‘lgan va 180 kishi jarohat olgan. Ma’lumotlarga ko‘ra, vafot etganlar orasida 5 yoshli bola va politsiya xodimi ham bo‘lgan.
Indoneziyaning siyosiy, huquqiy va xavfsizlik masalalari bo‘yicha koordinatori Muhammad Mahfudning aytishicha, o‘yin davomida stadion to‘la bo‘lgan: 38 ming o‘rindiqli stadionga 42 ming kishi kirgan.
2023-yilning 9-mart sanasida ushbu voqealar yuzasidan sud bo‘lib o‘tdi. Unda “Arema” futbol klubi tashkiliy qo‘mitasi raisi Abdul Horis e’tiborsizligi va stadion sig‘imidan ortiq chiptalarni sotganlikda aybdor deb topilib 1,5 yilga, shuningdek, “Arema” klubi xavfsizlik xizmati xodimi Suko Sutrisno esa 1 yilga ozodlikdan mahrum etildi.
Yana bir nafar stadion xodimi va uch nafar politsiyachining ishi keyinroq ko‘rib chiqiladigan bo‘ldi.
Izoh (0)