Владимир Кличко номи профессионал бокс шонли тарихига ўчмас ҳарфлар билан ёзилган. Украиналик боксчи узоқ йиллар мобайнида супер оғир вазн тоифасининг доминант чемпиони бўлиб келган ва спорт жамоатчилигининг ҳурматига эришган. Бироқ кичик Кличко фаолиятида ҳам кутилмаган ҳолатлар содир бўлган. Айниқса 2003 ва 2004 йилларда Владимирга осон бўлмаган. Ҳаммаси Кличконинг 2003 йил 8 март куни бўлиб ўтган Корри Сандерсга қарши жангидан кейин бошланганди.
Йил апсети
37 ёшли боксчи фаолиятининг сўнгги йилларини ўтказаётган эди. Сандерс фаолиятининг энг юқори босқичини 2000 йиллар арафасида босиб ўтганди. Аср бошида Ҳасим Раҳмонга ютқазиб қўйган ва жаҳон даражасидаги юлдуз мақомига эришиш имкониятини қўлдан чиқарганди. Ўша тўқнашувдан кейин Корри бор-йўғи иккита жанг ўтказган ва унда ҳам ўртамиёналарни енгганди.
Бироқ кутилмаганда унга WBO тоифасининг ёш чемпиони Владимир Кличкога қарши жанг қилиш таклифи берилади. Бунга қадар 26 ёшли Кличко ўз камарини беш бор ҳимоя қилишга муваффақ бўлганди. Қайд этиш керак, ўша вақтлари Владимир фаолиятининг сўнгги вақтларидан фарқли ўлароқ, тез-тез жанг қилиб турарди. Бешта ҳимоя жангини 20 ойда ўтказгани бунга исбот. Сандерсга қарши жанг унинг учун охирги икки йил ичидаги олтинчи ҳимоя жанги эди.
Владимир аввалги беш жангини муддатидан аввал ғалаба билан якунлаган ва буниси ҳам украиналик учун “энгил тушлик” бўлиши кутилганди. Умуман олганда экспертлар ҳам, букмекерлар ҳам, мухлислар ҳам Кличкони яққол фаворит ҳисоблаганди. Ўша вақтда ЖАР вакилининг ғалабасига ўзи ва жамоасидан бошқа ҳеч ким ишонмаётганди.
Дастлабки раунд анъанага кўра кузатув билан бошланди. Биринчи дақиқа тугаётган вақтда Кличко ўзининг ташриф қоғозига айланган жебларни йўллашни бошлайди. Иккинчи дақиқада ўтиб бораётганда эса Сандерс ўзининг асосий қуролини намойиш қилади — чап қўл зарбаси. Коррининг зарбаси ўтди ва рақибни мувозанатдан чиқараёзди. Владимир клинчда жон сақлашга ҳаракат қилди, бироқ Корри уни туртиб юбораверди. Украиналик рақибини шаштини пасайтириш учун қарши зарба йўллашга уринди. Бироқ Сандерс шуни кутгандек устунликни янада оширди. Масофани яқинлаштирган Корри чап томондан кучли ҳук зарбасини йўллади. Владимир бу зарбадан кейин рингга йиқилди. Туришга жуда қийналди. “Снайпер” қон исини сезди ва реферининг жангни давом эттириш буйруғидан кейин яна олдинга ташланди. Классик иккилик зарба ва Кличко яна нокдаун ҳолатида. Владимир бу сафар ҳам оёққа туришга куч топа олди ва бонг чалинди.
Иккинчи раунд бошида чемпион негадир зарбалар алмашинувига кириб кетди. Корридан яна бир чап қўл зарбасини қабул қилди ва нокдаун ҳолатига тушди. Кличко турди, бироқ рақибининг кейинги ҳужумидан кейин яна йиқилди. Сандерс қаттиқ зарбалари билан рақибини тўртинчи марта йиқитди ва шундан кейин рефери жангни тўхтатди.
Жанг бор-йўғи 207 сония давом этди ва йил апсети сифатида эътироф этилди. Айнан шу жангдан кейин кичик Кличкони “биллур жағ” деб атай бошлашди. ЖАРдан бўлган “Снайпер” ҳақиқатда кучли зарбага эга бўлгани ҳақида жуда камчилик қайд этади.
Кличконинг ўзи бу мағлубиятининг сабабини хотиржамликка берилиш ва рақибга етарли баҳо бермаслик билан тушунтиради.
Ўшанда Сандерсга нима учун ютқазганимни биламан. Ўша вақтга келиб жангларга тўйиб кетгандим. Жангдан бош торта олмасдим, чунки шартнома бор эди, промоутер шуни истаганди. Ўша вақтни эслайман, рингга чиқар эканман таътил ҳақида ўйлардим: ҳозир уни биринчи раунддаёқ бирёқлик қиламан ва дам олгани кетаман. Яъни жанг бошланмасидан олдин бой бериб бўлинганди. У каби портловчи зарбага эга жангчига қарши беллашув олдидан бундай ўйлаш ўзингни кўмишга тенг эди, — эслайди Владимир.
Қасос
Ушбу мағлубият ака-ука Кличколарнинг кичиги фаолиятига яхшигина зарба бўлди. Шу вақтда Виталий Кличко оила нуфузини тиклашни ўз зиммасига олди. Сандерс кейинги жангини Кличколарнинг каттасига қарши ўтказди.
Ўша вақтда собиқ мутлақ чемпион Леннокс Льюис украиналик боксчига қарши реванш жанги учун қайтмаслиги маълум бўлиб улгиргарди. Шу тариқа WBC камари вакант қолади, Виталий эса бу камарга мажбурий даъвогар эди. Сандерс Виталийга қарши жангда иштирок этиш учун WBO титулини ҳимоя қилишдан бош тортган ва ундан айрилганди.
Катта Кличко ушбу жангда фаворит сифатида кўрилади, бироқ ўтган жангдаги ғалаба боис Сандерснинг яна сенсация қайд этиш эҳтимолини ҳеч ким инкор этмасди. Бундан ташқари Виталийнинг кайфияти ҳам яхши эмасди, сабаб бу жангдан икки ҳафта олдин Владимир яна нокаут билан ютқазганди. Шундан кейин барча Владимирни ҳисобдан чиқарган ва бу акага янада кўпроқ масъулият юкларди.
Вазиятни инобатга олган Кличко жангни катта ғайрат билан бошлади. Сандерс эса бундан аввалги жангда фойда келтирган тактикани қўллайди. Биринчи раундда ЖАР вакили бир неча бор чап қўл зарбасини ўтказа олди. Раунд сўнгида Коррининг навбатдаги зарбаси Виталийни чайқатди, бироқ украиналик оёқда тура олди. Иккинчи раундда Сандерс яна воқеалар ривожини тезлаштиришга ҳаракат қилди, қуввати узоқ вақтга етмаслигини англар ва шу боис муддатидан аввал ғалаба қайд этишга уринарди. Бироқ Кличко йиқилмади ва учинчи раунддан бошлаб устунликни ўз қўлига ола бошлади. Олтинчи раунддан кейин жанг тўлиқ Украина вакили томонига ўтди. Виталий рақибига исталган услубда зарба берар, Сандерс уларга деярли жавоб қайтара олмасди. Натижада рефери саккизинчи раунд якунланиши арафасида жангни тўхатиб, техник нокаут қайд этди.
Виталий чиройли ғалаба қайд этган ҳолда супер оғир вазн тоифасида WBC камарини қўлга киритди. Уни табриклаш учун рингга югуриб чиққанлардан бири Владимир эди. Шу тариқа қасос олинганди.
Фожиали якун
Виталийга қарши жангдан кейин Сандерс кейинги тўрт йил мобайнида яна тўртта жанг ўтказди. 2008 йилда таниқли бўлмаган ватандошига ютқазганидан кейин фаолиятини якунлаганини маълум қилди.
2012 йилда фожиа содир бўлади. Преториядаги ресторанларнинг бирида қариндошининг туғилган кунини нишонлаётган Сандерс қуролли ўғрилар қурбонига айланади. Жиноятчилардан қизини ҳимоя қилишга уринган Корри оғир яраланади ва воқеанинг эртаси куни шифохонада вафот этади. Ўшанда собиқ чемпион 46 ёшда эди. Жиноятчилар қўлга тушади ва уларга нисбатан 43 йил озодликдан маҳрум этиш жазоси қўлланилади.
Изоҳ (0)