“Bavariya” so‘nggi 6 o‘yinning 5 tasida “PSJ”dan ustun keldi, parijliklar yil boshidan buyon 6-mag‘lubiyatini qabul qildi. Myunxenda o‘tgan o‘yindagi raqamlar va faktlar

Futbol bo‘yicha Yevropa Chempionlar Ligasining nimchorak final javob o‘yinida “Bavariya” va “PSJ” 8-mart, chorshanba kuni o‘zaro bahs olib bordi.

Uchrashuvda myunxenliklar 2:0 hisobida zafar quchdi. 61-daqiqada Erik Maksim Shupo-Moting gol urgan bo‘lsa, 89-daqiqada Serj Gnabri yakuniy hisobni o‘rnatdi.

Shu tariqa “Bavariya” parijliklar bilan so‘nggi 6 o‘yinning 5 tasida g‘alaba qozondi. 2017-yil 5-dekabridan buyon Myunxen klubi 5 ta o‘yinda g‘olib bo‘ldi va faqatgina 2021-yil 7-aprel kunidagi o‘yinda 2:3 hisobida mag‘lubiyatga uchragan. 

“PSJ” esa 2023-yildagi 6-mag‘lubiyatini qabul qilib oldi. Kristof Galte shogirdlari joriy yil 15 ta o‘yinda ishtirok etib, shundan oltitasida (“Lans”ga qarshi 1:3, “Renn”ga qarshi 0:1, “Monako”ga qarshi 1:3, “Marsel”ga qarshi 1:2, “Bavariya”ga qarshi o‘yinda 0:1 va 0:2) mag‘lub bo‘ldi. 2023-yil boshiga qadar esa jamoa biror marotaba imkoniyatni boy bermagandi. 

“PSJ” hujumchisi Lionel Messi Chempionlar Ligasida asosiy tarkibda maydonga tushish bo‘yicha 3-o‘ringa ko‘tarilib oldi. Argentinalik “Bavariya”ga qarshi bahsda o‘z faoliyatida 150-marta asosiy tarkibda maydonga tushdi. Faqatgina Iker Kasilyas (176 marta) va Krishtianu Ronaldular (178) undan oldinda. 

Leo ketma-ket uchinchi marta YCHL nimchorak finalida o‘z ishtirokini yakunlamoqda (2 yil “PSJ” bilan, bir yil “Barselona” safida) va ketma-ket 8-yil turnir finaliga chiqa olmayapti. Messi so‘nggi bor 2015-yilda “Barselona” bilan birga “shalpangquloq”ni qo‘lga kiritgandi. O‘shanda kataloniyaliklar “Yuventus”ni 3:1 hisobida mag‘lub etgan.