Yaqin o‘tmishning eng nomdor bokschilaridan biri Vitaliy Klichko og‘ir vazn toifasida uch karra jahon chempioni bo‘lgani yakkakurash muxlislariga yaxshi ma’lum. Vitaliy faoliyati davomida 47 ta jang o‘tkazib, shularning 45 tasida g‘alaba qozongan (41 ta nokaut), 2 tasida esa mag‘lubiyatga uchragan, shu bilan birga u biror marta nokdaun holatiga tushmagan.
Vitaliy Klichko WBO (1999—2000), The Ring jurnali (2004—2005) va WBC (2004—2005; 2008—2013) talqinlariga ko‘ra jahon chempioni hamdir. Shuningdek, u debyutantdan jahon chempionigacha bo‘lgan yo‘lga eng kam raund sarflash bo‘yicha rekordchi hisoblanadi. Bundan tashqari, Vitaliy boks tarixida faoliyati davomida muddatidan oldin qozonilgan g‘alabalar bo‘yicha ikkinchi eng yaxshi ko‘rsatkichga ega (87,2%). Bu ko‘rsatkich bo‘yicha ukrainalik bokschi yengilmas Rokki Marchianodan orqada. Klichko 2018-yilda boks shon-sharaf zaliga kiritilgan. Quyida esa Klichkoning faoliyatidagi asosiy janglar haqida so‘z yuritiladi.Vitaliy Klichko (37-2) — Kris Arreola (27-0), 2009-yil
2009-yilda 38 yoshli Vitaliy AQShdagi so‘nggi jangini o‘tkazadi, unga mezbon Kris Arreola raqiblik qiladi. O‘shanda 28 yoshli Arreola WBC kamari uchun majburiy da’vogar bo‘lib turgandi va Amerikaning navbatdagi umidi edi.
Ushbu jang oldidan mag‘lubiyatga uchramagan Arreola dastlabki raundlarda tajribali raqibining zarbalaridan qochib, oldinga o‘tishga muvaffaq bo‘ladi. Klichko esa ringda ko‘proq ikkinchi raqam sifatida ishlaydi. Garchi chidamlilik ko‘rsatib kelgan bo‘lsa ham, jang davomida Kris ukrainalikning ko‘plab zarbalarini o‘tkazib yuboradi. Klichko jangni to‘liq o‘z nazoratiga oladi va qarshi hujumlardan muvaffaqiyatli foydalanadi. O‘ninchi raundga kelib, amerikalikning g‘alaba qozonish imkoniyati deyarli nolga tengligi ma’lum bo‘ladi. Arreolaning murabbiylari o‘n birinchi raund boshlanishini kutmasdan hakamdan jangni to‘xtatishni so‘raydi – referi amerikalikning burchagiga borib, Krisning holatini baholab, jangni to‘xtatishga qaror qiladi.
Vitaliy Klichko (34-2) — Denni Uilyams (32-3), 2004-yil
Vitaliy ushbu jangda WBC kamarini ilk marta himoya qiladi. Bu qarama-qarshilikda unga afsonaviy Mayk Tayson raqiblik qilishi mumkin edi. Biroq “Temir Mayk” sensatsion tarzda 4-raundda Denni Uilyamsga nokaut bilan yutqazib qo‘yadi, shu bois Klichkoga qarshi aynan britaniyalik ringga ko‘tariladi.
Tomonlar ajoyib jang ko‘rsatib beradi. Denni birinchi raunddayoq Vitaliyning uzoq davom etgan seriyasidan so‘ng nokdaunga tushib qoladi. Uchinchi raund yakunida Klichko britaniyalikni ajoyib apperkoti bilan navbatdagi nokdaunga jo‘natadi. Ammo Uilyams taslim bo‘lmaydi va jang o‘rtasida hatto vaziyatni o‘nglashga ham muvaffaq bo‘ladi. Biroq 7 va 8-raundlarda yana nokdaunga uchraydi, shundan keyin hakam jangni to‘xtatadi.
Lennoks Lyuis (40-2-1) — Vitaliy Klichko (32-1), 2003-yil
Ushbu afsonaviy jang haqida qancha gapirilsa ham kam. “Yuz marta eshitgandan, bir marta ko‘rgan afzal” degan ibora aynan mana shu bahsga atab aytilgandek. Ushbu dramatik to‘qnashuvda tomoshabinlar tom ma’noda hamma narsaga guvoh bo‘ladi: nokaut yoqasidagi favorit, da’vogarning dahshatli jarohatlari va zarbalar yomg‘iri. Aynan mana shu jang tufayli Vitaliy Qo‘shma Shtatlarda o‘zi uchun nom qozongan va yuz minglab muxlislarni o‘ziga rom etgan.
Ammo afsuski, jang Vitaliyning g‘alabasi bilan yakunlanmaydi, shu bois bu jang mazkur ro‘yxatda 3-o‘rin bilan cheklandi.
Jangga Lyuisning IBO, WBC va The Ring kamarlari qo‘yiladi. 3-raundga kelib, Vitaliyning qoshi yorilib ketadi. Aynan mana shu jarohat 6-raundga kelib, jangning to‘xtatilishiga olib keladi. Lennoks texnik nokaut bilan g‘alaba qozonadi. Ammo jang to‘xtatilayotgan vaqtda Klichko ochkolar hisobida oldinda borayotgan bo‘lgan. Jangdan so‘ng Lyuis Klichkoga revansh jangini berishga va’da beradi, ammo Lennoks orada faoliyatini yakunlaydi va revansh o‘tkazilmaydi.
Vitaliy Klichko (35-2) — Semyuel Piter (30-1), 2008-yil
Vitaliy bu janggacha turli jarohatlar tufayli deyarli 4 yil davomida ringga chiqmagandi. Shu sababli WBC yo‘nalishi bo‘yicha jahon chempioni bo‘lgan o‘sha paytdagi dahshatli Samuel Piter bilan duelga kirishish juda xavfli harakat bo‘lib tuyulgandi.
Shunga qaramay Klichko barcha xavotirlarni yo‘qqa chiqaradi. 8 raund davomida, to Piter jangni davom ettirishdan bosh tortmaguncha, Klichko unga tinchlik bermaydi.
37 yoshida, 4 yillik tanaffusdan keyin amaldagi chempion ustidan bunday ustunlik, haqiqatan ham juda qimmatlidir.
Vitaliy Klichko (33-2) — Korri Sanders (39-2), 2004-yil
Sanders Vitaliydan oldin uning ukasi Vladimir Klichko bilan jang qilib, uni mag‘lubiyatga uchratgandi.
Vitaliy bilan esa naq uch marta to‘qnash keladi. Ular o‘rtasidagi aynan so‘nggi jang ro‘yxatga yakun yasab beradi. G‘olib vakant qolgan WBC va The Ring kamarlarini qo‘lga kiritardi.
Birinchi raund tom ma’noda triller kabi o‘tadi, Korri Vitaliyni qulatishiga ham bir baxya qoladi. Ikkinchi va uchinchi raundlarda ham Sanders o‘z uslubida — chap zarbasi bilan bir necha bor muvaffaqiyatli qarshi hujumlarga o‘tadi, biroq Klichko har safar ishonchli harakat qilar va o‘ng tomondan aniq zarbalar yo‘llardi. To‘rtinchi raunddan keyin jang Sandersni uslubiy jihatdan mag‘lub etgan Vitaliyning katta ustunligi bilan o‘tadi. Sakkizinchi raundga kelib esa hakam Korrini raqibiga qarshilik ko‘rsata olmaydi deb hisoblab, Klichkoning texnik nokaut bilan g‘alabasini qayd etadi.
Izoh (0)