Belarusda Minsk yaqinidagi Machulishi aerodromida qo‘poruvchilik qilishga urinishda ishtirok etgan “Ukraina maxsus xizmatlari terrorchisi” va uning “sheriklari” qo‘lga olindi. “BelTA” xabariga ko‘ra, Aleksandr Lukashenko yuqori martabali zobitlarga davlat mukofotlarini topshirish chog‘ida bu haqda gapirgan.
Lukashenkoning so‘zlariga ko‘ra, “Belarusga qarshi operatsiya” taxminan olti oy yoki sakkiz oy oldin Ukraina Xavfsizlik xizmati va Markaziy razvedka boshqarmasi tomonidan ishlab chiqila boshlagan. U so‘zlariga dalil keltirmadi.
Lukashenkoning aytishicha, “terrorchi” Kiyevda tayyorgarlikdan o‘tgan, Rossiya va Ukraina fuqaroligiga ega, Krivoy Rog shahrida tug‘ilgan, Qrimda yashagan. “Ba’zi qarindoshlari Avstriyada, ba’zilari Kiyevda. Aftidan, u Ukraina maxsus xizmatlari tomonidan 2014-yilda ishga olingan. IT mutaxassisi yoki IT texnologiyalarini yaxshi bilgan. U terrorchilik harakatlarini amalga oshirishga tayyorlanib kelgan”, — dedi Belarus rahbari.
Lukashenkoning so‘zlariga ko‘ra, diversant bir oydan ko‘proq vaqt davomida “eng yuqori texnologiya” yordamida o‘qitilgan, so‘ngra Polsha, Latviya va Rossiya orqali Belarusga jo‘natilgan. Uning so‘zlariga ko‘ra, Machulishida sabotaj uchun “kichkina dron” ishlatilgan, shuning uchun Belarus tizimlari uning ortidan kuzatmagan.
Lukashenko voqeaning boshqa tafsilotlarini “keyinroq” aytishni va’da qildi. Uning qayd etishicha, qo‘poruvchilik nishoniga aylangan Rossiyaning A-50 razvedka samolyoti jiddiy zarar ko‘rmagan.
“Yaxshiyamki, samolyot, ular aytganidek, tirnalgani va korpusdagi bitta teshikdan tashqari jiddiy zarar ko‘rmadi. Bu harbiy samolyotning o‘z vazifalarini bajarishiga to‘sqinlik qilmaydi. Shunga qaramay, biz rossiyaliklardan ushbu samolyotni xizmatdan olib, boshqasini jo‘natishlarini so‘radik”, — dedi Lukashenko.
Minsk aerodoromidagi sabotaj
26-fevralga o‘tar kechasi guvohlar Minsk yaqinidagi Machulishi aviabazasi yaqinida portlash ovozlari eshitilgani va ko‘plab harbiy xizmatchilar to‘plangani haqida xabar berishdi. Shundan so‘ng BYPOL’ning belaruslik faollari aerodromda qo‘poruvchilik uyushtirib, u yerda joylashgan Rossiyaning A-50 samolyotiga ikkita drondan portlovchi moslamalar tashlangani, natijada samolyot shikastlangani haqida ma’lum qilishdi.
Dastlab, faollar qo‘poruvchilik haqida hech qanday videodalil keltirmagan, keyin esa Machulishida ko‘rinishidan drondan suratga olingan videoni e’lon qildi. Unda dron A-50 gacha boradi va samolyot antennasiga qo‘nadi, shundan so‘ng hech bir to‘siqsiz uchib ketadi.
Belarus hukumati Machulishidagi voqeaga deyarli rasman izoh bermadi. Belarus tashqi ishlar vaziri o‘rinbosari Yuriy Ambrazevich aerodromga hujum haqidagi xabarlarni “soxta” deb atadi. Bundan tashqari, Belarus hukumati A-50 uchish-qo‘nish yo‘lagi bo‘ylab harakatlanayotgani aks etgan videoni e’lon qildi. Samolyot harakati portlash sodir bo‘lganidan keyin amalga oshirilganini tasdiqlovchi tafsilotlar yo‘q. 2-mart kuni Telegram’da A-50 samolyoti Machulishidan havoga ko‘tarilgani tasvirlangan video tarqaldi.
Mart oyi boshida “Zerkalo” nashri Machulishi harbiy aerodromida joylashgan Rossiyaning A-50 samolyoti ta’mirlash uchun Taganrogga uchib ketgani haqida xabar berdi.
Izoh (0)