Turkiya Bosh prokuraturasi suddan 2022-yilning 13-noyabr kuni Istanbulning Istiqlol ko‘chasida terakt sodir etgan Suriya fuqarosi Ahlam Albashirga uch ming yillik qamoq jazosi tayinlashni so‘radi. Bu haqda Turkiyaning Anadolu axborot agentligi xabar bermoqda.
Qayd etilishicha, ayblov xulosasida Bosh prokuratura jinoyatning qasddan va davlatga qarshi uyushtirilgani sababli suriyalik ayol uchun 7 karra umrbod qamoq jazosini talab qilgan. Huquq-tartibot idoralari maʼlumotlariga ko‘ra, portlovchi moslama solingan sumkani aynan Albashir qoldirgan, keyin u portlab ketgan. Terakt ishi bo‘yicha sud majlislari 2023-yil 9—11-may kunlari Istanbul sudida bo‘lib o‘tadi.
Avvalroq Istiqlol ko‘chasida terakt tayyorlashga aloqadorlikda gumon qilingan 17 nafar shaxs qo‘lga olingan edi. Hibsga olinganlar davlat birligi va yaxlitligini buzish, qasddan qotillik va suiqasdda ayblangan.
Istanbuldagi terakt oqibatida sakkiz kishi halok bo‘lgan, 81 kishi jarohatlangandi. Mamlakat ichki ishlar vazirligi portlash ortida Turkiyada terrorchi tashkilot deb tan olingan Kurdiston ishchilar partiyasi (KIP) tarafdorlari turganini aytdi.
KIP 1984-yildan beri Turkiya hukumatiga qarshi turli vositalar bilan urush olib bormoqda. Mamlakatning asosan kurdlar yashaydigan janubi-sharqida KIP jangarilari xavfsizlik kuchlari va rasmiylarga hujumlar uyushtirmoqda. Iroq va Suriya shimolida KIPning bazalari mavjud bo‘lib, Turkiya Qurolli kuchlari ularga qarshi havo va quruqlikdagi amaliyotlar o‘tkazib turadi.
Izoh (0)