“Yadroviy raqiblari” soni ortishi fonida AQSH zarur bo‘lgan yadro kallaklarining hisobini olishi kerak. Bu haqda AQSH sobiq prezidenti Donald Trampning milliy xavfsizlik bo‘yicha sobiq maslahatchisi Jon Bolton The Washington Post gazetasidagi maqolasida yozdi.
Boltonning so‘zlariga ko‘ra, Rossiya prezidenti Vladimir Putin Strategik qurollarni qisqartirish bo‘yicha kelishuvda Rossiyaning ishtirokini to‘xtatishga qaror qilganidan so‘ng, Vashington endilikda nafaqat Moskva, balki Pekin ham uning yadroviy raqibi ekanligini tan olishi kerak.
Uning fikricha, Qo‘shma Shtatlar Rossiya bilan “yadroviy qarama-qarshilik”ga borishi mumkin va agar Vashington bu vaziyatda g‘olib chiqsa ham, u darhol Pekin bilan yadroviy ziddiyatga duch keladi.
“Vashington ikki raqibga qarshi turish uchun AQSHning yadroviy aktivlari qanchalik katta bo‘lishi kerakligi haqidagi asosiy savollarga javob berishi zarur”, — deb yozadi u.
Sobiq maslahatchining qo‘shimcha qilishicha, Vashington Shimoliy Koreya va “yadroviy qurol yaratishga intilayotgan” Eron Rossiya va Xitoyni ittifoqchi, AQSH va ularning hamkorlarini esa dushman deb bilishga moyilligini ham hisobga olishi lozim.
Shu munosabat bilan, deydi Bolton, AQSH avval yadro kallaklari sonini qayta ko‘rib chiqishi, so‘ngra yadroviy qurol masalasida diplomatiya bilan shug‘ullanishi kerak.
Izoh (0)