Беларусда Минск яқинидаги Macҳулиши аэродромида қўпорувчилик қилишга уринишда иштирок этган “Украина махсус хизматлари террорчиси” ва унинг “шериклари” қўлга олинди. “БелТА” хабарига кўра, Александр Лукашенко юқори мартабали зобитларга давлат мукофотларини топшириш чоғида бу ҳақда гапирган.
Лукашенконинг сўзларига кўра, “Беларусга қарши операция” тахминан олти ой ёки саккиз ой олдин Украина Хавфсизлик хизмати ва Марказий разведка бошқармаси томонидан ишлаб чиқила бошлаган. У сўзларига далил келтирмади.
Лукашенконинг айтишича, “террорчи” Киевда тайёргарликдан ўтган, Россия ва Украина фуқаролигига эга, Кривой Рог шаҳрида туғилган, Қримда яшаган. “Баъзи қариндошлари Австрияда, баъзилари Киевда. Афтидан, у Украина махсус хизматлари томонидан 2014 йилда ишга олинган. IT мутахассиси ёки IT технологияларини яхши билган. У террорчилик ҳаракатларини амалга оширишга тайёрланиб келган”, — деди Беларусь раҳбари.
Лукашенконинг сўзларига кўра, диверсант бир ойдан кўпроқ вақт давомида “энг юқори технология” ёрдамида ўқитилган, сўнгра Польша, Латвия ва Россия орқали Беларусга жўнатилган. Унинг сўзларига кўра, Macҳулишида саботаж учун “кичкина дрон” ишлатилган, шунинг учун Беларусь тизимлари унинг ортидан кузатмаган.
Лукашенко воқеанинг бошқа тафсилотларини “кейинроқ” айтишни ваъда қилди. Унинг қайд этишича, қўпорувчилик нишонига айланган Россиянинг А-50 разведка самолёти жиддий зарар кўрмаган.
“Яхшиямки, самолёт, улар айтганидек, тирналгани ва корпусдаги битта тешикдан ташқари жиддий зарар кўрмади. Бу ҳарбий самолётнинг ўз вазифаларини бажаришига тўсқинлик қилмайди. Шунга қарамай, биз россияликлардан ушбу самолётни хизматдан олиб, бошқасини жўнатишларини сўрадик”, — деди Лукашенко.
Минск аэродоромидаги саботаж
26 февралга ўтар кечаси гувоҳлар Минск яқинидаги Macҳулиши авиабазаси яқинида портлаш овозлари эшитилгани ва кўплаб ҳарбий хизматчилар тўплангани ҳақида хабар беришди. Шундан сўнг BYPOL’нинг беларуслик фаоллари аэродромда қўпорувчилик уюштириб, у ерда жойлашган Россиянинг А-50 самолётига иккита дрондан портловчи мосламалар ташлангани, натижада самолёт шикастлангани ҳақида маълум қилишди.
Дастлаб, фаоллар қўпорувчилик ҳақида ҳеч қандай видеодалил келтирмаган, кейин эса Macҳулишида кўринишидан дрондан суратга олинган видеони эълон қилди. Унда дрон А-50 гача боради ва самолёт антеннасига қўнади, шундан сўнг ҳеч бир тўсиқсиз учиб кетади.
Беларусь ҳукумати Macҳулишидаги воқеага деярли расман изоҳ бермади. Беларусь ташқи ишлар вазири ўринбосари Юрий Амбразевич аэродромга ҳужум ҳақидаги хабарларни “сохта” деб атади. Бундан ташқари, Беларусь ҳукумати А-50 учиш-қўниш йўлаги бўйлаб ҳаракатланаётгани акс этган видеони эълон қилди. Самолёт ҳаракати портлаш содир бўлганидан кейин амалга оширилганини тасдиқловчи тафсилотлар йўқ. 2 март куни Telegram’да А-50 самолёти Macҳулишидан ҳавога кўтарилгани тасвирланган видео тарқалди.
Март ойи бошида “Зеркало” нашри Macҳулиши ҳарбий аэродромида жойлашган Россиянинг А-50 самолёти таъмирлаш учун Таганрогга учиб кетгани ҳақида хабар берди.
Изоҳ (0)