Yaponiya o‘z orollarini qayta sanaganda, ular avvalgi hisobdan 7 mingtaga ko‘p bo‘lib chiqdi

Yaponiya o‘z orollarini qayta sanab chiqdi va ular ilgarigi hisobdan 7000 taga ko‘p ekanini aniqladi, deb yozmoqda CNN.

Yaqinda Yaponiya geofazoviy ma’lumot boshqarmasi (GSI) tomonidan o‘tkazilgan raqamli xaritalash mashg‘ulotlari shuni ko‘rsatdiki, Yaponiyada 14 125 ta orol bor, bu 1987-yildan beri rasman foydalanib kelingan 6 852 ta oroldan ikki baravar ko‘p.

Ta’kidlanishicha, yangi raqam geodeziya texnologiyasidagi yutuqlarni va hisoblash uchun foydalaniladigan xaritalarning batafsil o‘rganilganini ko‘rsatadi — ushbu orollar Yaponiyaga tegishli yerlarning umumiy maydonini o‘zgartirmaydi.

GSI hisobotda aytilishicha, orollarni qanday sanash bo‘yicha xalqaro kelishuv mavjud bo‘lmasa-da, u 35 yil oldingi mezondan foydalangan. Aylanasi kamida 100 metr bo‘lgan barcha tabiiy yer maydonlari hisobga kiritilgan.

Yangi raqamga sun’iy ravishda qayta tiklangan yerlar kiritilmagan.

Yaponiyani o‘rab turgan orollar bir qancha hududiy bahslarning markazida bo‘lib kelmoqda. Yaponiya Rossiya tarkibidagi janubiy Kuril orollariga da’vogarlik qiladi, Tokio uni Shimoliy hududlar deb ataydi, bu bahs Ikkinchi jahon urushi oxirida, Sovet qo‘shinlari orollarni Yaponiyadan o‘zlashtirib olgan paytdan boshlangan.

Yaponiya, shuningdek, Sharqiy Xitoy dengizidagi kimsasiz Senkaku orollariga tarixiy da’vosi borligini aytadi. Orol hozirda Tokio tomonidan nazorat qilinadi, biroq Xitoy bu da’voga bir necha bor e’tiroz bildirgan.

Shu bilan birga, Yaponiya va Janubiy Koreya Yapon dengizidagi Seul Dokdo deb ataydigan, Tokio Takeshima deb nomlagan orollarning suvereniteti bo‘yicha 70 yildan ortiq vaqtdan beri bahslashib keladi.