AQSHning sobiq prezidenti Donald Tramp bu “jasoratini yo‘qotgan” mamlakatda “yangi Amerika kelajagini yaratish” uchun 10 tagacha futuristik “ozodlik shaharlari”ni qurishni taklif qildi. Bu haqda CNN telekanali xabar bermoqda.
Tramp prezident bo‘lgach, o‘zlashtirilmagan yerlarda taxminan Vashington hududiga teng 10 tagacha “ozodlik shaharlari”ni ijaraga berish uchun tender eʼlon qilishini aytdi. Sobiq prezident amerikaliklar o‘tmishda chegarada shaharlar qurib, yovvoyi dalada yangi mamlakat yaratganini, endi esa ular koinotga sun’iy yo‘ldoshlarni uchirishayotganini esladi. Uning so‘zlariga ko‘ra, “ozodlik shaharlari”ni qurish Amerika orzusini qaytarishga yordam beradi.
“Biz chindan ham mamlakatimizda yana yangi shaharlar quramiz”, — dedi 45-prezident. “Bu ozodlik shaharlari chegaralarni qayta ochadi, Amerika tasavvurlarini qaytadan uyg‘otadi va yuz minglab yoshlar, barcha mehnatkash oilalarga uy-joy, boshqacha aytganda Amerika orzusiga ega bo‘lish uchun yangi imkoniyat beradi”.
Shuningdek, u ushbu futuristik shaharlar aholisi uchar mashinalardan foydalana oladigan bo‘lishini qo‘shimcha qildi. Tramp AQSH va Xitoyning yirik aviakompaniyalari, avtomobil ishlab chiqaruvchilari va boshqa kompaniyalar tomonidan vertikal uchish va qo‘nish apparatlarini ishlab chiqish bo‘yicha ishlar allaqachon olib borilayotganini ta’kidladi. Shu bilan birga, Trampning fikricha, AQSH Xitoyni ortda qoldirib, bu sohada yetakchilik qilishga qodir.
2022-yil 15-noyabrda Donald Tramp 2024-yilda yana prezidentlikka nomzodini qo‘yish istagi borligini maʼlum qildi. Uning yangi shaharlar qurish g‘oyasi 2023-yil 28-yanvarda boshlagan saylov kampaniyasi doirasida eʼlon qilingan.
Izoh (0)