Rossiya hukumati Yaponiya fuqarolariga Kuril orollariga vizasiz tashrif buyurish imkonini bergan 1991-yilgi kelishuvni bekor qildi, deb yozadi Meduza Rossiya bosh vaziri Mixail Mishustin imzolagan hujjatga tayanib.
Shuningdek, Mishustin 1999-yilgi bitimni ham bekor qildi, unga muvofiq, Yaponiya fuqarolari — Kunashir, Iturup orollari va Kichik Kuril tizmasi orollari fuqarolari va ularning oila a’zolari ushbu orollarga soddalashtirilgan tartibda tashrif buyurishi mumkin edi.
1991-yilgi kelishuv — “SSSR tashqi ishlar vaziri va Yaponiya tashqi ishlar vaziri o‘rtasida o‘zaro tashriflar tartibi haqidagi xatlar almashinuvi shaklidagi bitim” bo‘lib, u 1991-yil 14-oktabrda imzolangan. Rossiya TIV ushbu kelishuv “Rossiyaning janubiy Kuril orollari va Yaponiya o‘rtasidagi vizasiz almashinuv”ni tartibga solishini ma’lum qilgandi.
Shundan keyin Yaponiya hukumati Moskvaning ushbu qarori yuzasidan Rossiyaga “qat’iy norozilik” bildirdi. Yaponiya vazirlar mahkamasi bosh kotibi Xirokadzu Matsunoning so‘zlariga ko‘ra, Yaponiya-Rossiya munosabatlarning hozirgi holati uchun aynan Rossiya javobgar, biroq Yaponiya Kuril orollariga tashrif buyurish bo‘yicha choralar ko‘rishda unga xalal bera olmaydi.
Mart oyida Rossiya TIV Rossiya Ukrainaga bostirib kirganidan keyin Yaponiya tomonidan kiritilgan sanksiyalarning “ochiqdan ochiq dushmanlarcha xususiyatini hisobga olib” Yaponiya fuqarolari uchun Kurill orollariga vizasiz rejimni bekor qilishga qaror qilganini bildirgandi.
Sovet ittifoqi Ikkinchi jahon urushi yakunlari bo‘yicha Janubiy Kuril orollarini o‘ziga qo‘shib olgandi. 1956-yilda SSSR Yaponiya bilan tinchlik deklaratsiyasini imzolagan va tinchlik shartnomasi tuzilganidan keyin Shikotan va Xabomai orollarini qaytarishga va’da bergandi. Shundan keyin yillar davomida Yaponiya barcha orollarni qaytarishni talab qilib kelgan, ammo shartnoma imzolanmay qolgan.
2022-yil martida, G‘arb sanksiyalari joriy etilganidan keyin Rossiya Yaponiya bilan tinchlik shartnomasi haqidagi muzokaralarni to‘xtatganini e’lon qildi. Aprel oyida Yaponiya TIV 2003-yildan buyon birinchi marta Kuril orollarini “noqonuniy bosib olingan” hudud deb atadi.
Janubiy Kuril orollari — Kunashir, Shikotan, Iturup va Xabomai guruhi bo‘lib, Yaponiya Rossiyaning ular ustidan suverenitetiga e’tiroz bildirishga urinib keladi. Tokio ushbu hududlarni “shimoliy” deb ataydi.
Mavzuga doir:
- Yaponiya Rossiyaning “Vostok-2022” harbiy mashg‘ulotlari o‘tkazilishidan xavotir bildirdi
- Tokio Rossiyani Kuril orollarining janubiy qismida harbiy mashg‘ulotlar o‘tkazmaslikka chaqirdi
- Rossiya Mudofaa vazirligi Amerikaning yadroviy suvosti kemasi Kuril orollarida Rossiya chegarasini buzib kirgani haqida xabar qildi. Pentagon buni rad etdi
Izoh (0)