AQSH armiyasining sobiq askari, 24 yoshli Erik Meltser “To‘qqiz burchakli orden” neonatsist guruhiga maxfiy ma’lumotlarni uzatgani sababli terrorchilarni qo‘llab-quvvatlash va AQSH harbiy xizmatchilariga suiqasd uyushtirishda ayblanib, 45 yillik qamoq jazosiga hukm qilindi. Bu haqda NBC xabar bermoqda.
“Meltser o‘zining qayerdaligi, nechi kishi ekani va qurollari haqidagi ma’lumotlarni bir guruh neonatsistlarga, anarxistlarga va oqlarni ustun deb biluvchilarga noqonuniy ravishda oshkor qilib, o‘z bo‘linmasiga qarshi halokatli pistirma uyushtirishga uringan”, — dedi prokuror Odri Shtraus.
Meltserning advokati Jonatan Marvinni hukm juda og‘ir ekanini aytmoqda. “U jazoga loyiq, lekin u hayotda yaxshilik qila olishini isbotlash imkoniyatiga ham loyiq. Bugungi hukm uni bu imkoniyatdan mahrum qildi”, — dedi himoya tomoni. Prokurorning so‘zlariga ko‘ra, Meltser 2017-yildan buyon “Orden” bilan aloqador bo‘lgan, armiyaga esa 2018-yilda okkultistlarga (okkultizm xurofotlarga ishontiruvchi mistik ta’limot) yordam berish uchun qo‘shilgan.
2020-yilda Meltser o‘z bo‘linmasi xorijdagi maxfiy harbiy obyektni qo‘riqlashda yordamlashishi haqida bilgach, u joylashuv ma’lumotlarini guruhga yetkazgan. O‘z navbatida, okkultistlar bo‘linmaga hujum qilish imkoniyatini maksimal darajada oshirish uchun bu ma’lumotlarni “Al-Qoida” a’zosiga topshirgan. “Ayblanuvchi Qo‘shma Shtatlarni uzoq davom etadigan qurolli to‘qnashuvga tortishni o‘ylagan, bu esa imkon qadar ko‘proq askarning o‘limiga olib kelishi mumkin edi”, — dedi Adliya vazirligi.
“To‘qqiz burchakli orden” — Buyuk Britaniyada joylashgan okkultizm va yovuzlik guruhidir, dunyoning boshqa qismlarida ham uning sho‘ba korxonalari mavjud. Guruh 1960-yillarda yaratilgan, ammo 1980-yillarda mashhurlikka erishib, neonatsistlar mafkurasi bilan eʼtiborni tortdi. Xususan, guruh o‘z a’zolaridan jinoyat sodir etishni talab qiladi.
Izoh (0)