G‘uzor tumani hokimligi tadbirkorning hokimlik binosiga chorva mollarini haydab kelgani yuzasidan rasmiy munosabat bildirdi.
Aniqlanishicha, 2023-yilning 27-fevral kuni g‘uzorlik fermer Ixtiyor Panjiyevning ukasi Jasur Panjiyev kredit mablag‘larini o‘zlashtirishda ayblanib, qamoqqa olingan akasini qamoqdan chiqarishni talab qilib o‘ziga tegishli chorva mollarini tuman hokimligi binosi oldiga haydab kelgan.
Maʼlum bo‘lishicha, G‘uzor tumanidagi “Yetti saodat nuri‘ MCHJga 2020-yil 13-may kuni AT “Xalq banki” G‘uzor filiali tomonidan 4 milliard 278 million so‘m miqdoridagi kredit mablag‘i ajratilgan. Fermer esa bu mablag‘ga Avstriyadan 152 bosh zotli qoramol olib kelgan.
“Yetti saodat nuri' MCHJ rahbari Ixtiyor Panjiyev biznes rejada ko‘rsatilgan ‘Chorvachilikni rivojlantirish, go‘sht va sut mahsulotlari sotish‘ faoliyati bilan shug‘ullanmasdan, 2020-yilning sentabr-noyabr oylarida Avstriyadan olib kelingan 4 milliard 278 million so‘mlik 152 bosh naslli yirik shoxli chorva mollarining 2 milliard 561 million 445 ming 600 so‘mga baholangan 98 boshini nomaʼlum shaxslarga sotib yuborgan.
Viloyat hayvonlar kasalliklari tashxisi va oziq-ovqat mahsulotlari xavfsizligi davlat markazi tomonidan nobud bo‘lgan chorva mollarining birortasida yuqumli va boshqa kasalliklar aniqlanmagan bo‘lsa-da, 2021-yilning 22-fevral va 27-iyul kunlari chorva mollari turli kasalliklar sababli o‘lganligi to‘g‘risida qalbaki dalolatnomalar rasmiylashtirib, bankning juda ko‘p miqdorda kredit mablag‘larini o‘zlashtirilgan.
Mazkur holat yuzasidan Bosh prokuratura huzuridagi departamentning G‘uzor tumani bo‘limi tomonidan 2023-yil 29-yanvar kuni “Yetti saodat nuri” masʼuliyati cheklangan jamiyati rahbari Ixtiyor Panjiyev AT ”Xalq banki” G‘uzor filiali mansabdor shaxslari va boshqalarga nisbatan Jinoyat kodeksining 167-moddasi 3-qismi “a” bandi (ko‘p miqdorda o‘zlashtirish yoki rastrata yo‘li bilan talon-toroj qilish) va boshqa moddalari bilan jinoyat ishi qo‘zg‘atilgan”, — deyiladi G‘uzor hokimligining rasmiy munosabatida.
Taʼkidlanishicha, holat yuzasidan tuman prokuraturasi tomonidan dastlabki tergov harakatlari olib borilmoqda. Tergov jarayonida jamiyat rahbariga nisbatan qamoq ehtiyot chorasi qo‘llanilgan.
“Bank kreditini ajratish jarayonida MCHJga tegishli yer maydonlari yetarli ekanligi eʼtiborga olingan. Xususan, G‘uzor tumani hokimining 2019-yil 10-iyundagi va 2021-yil 29-yanvardagi qarorlariga asosan MCHJga jami 81,5 gektar, shundan 78,46 gektar sug‘oriladigan yer maydonlari ajratib berilgan. Yer kodeksining 46-1-moddasi 1-qismi 3-bandida chorvachilik mahsulotini ishlab chiqarishga ixtisoslashganlarga ozuqa ekinlarini yetishtirish uchun (shartli bir bosh qoramol uchun) sug‘oriladigan yerlardan — kamida 0,3 gektar va lalmikor yerlardan — kamida 1 gektar o‘lchamda ajratilishi nazarda tutilgan. Ushbu qonun normalariga ko‘ra, ‘Yetti saodat nuri‘ MCHJ tomonidan keltirilgan 152 bosh chorva mollari uchun jami 45,6 gektar yer maydoni talab etiladi. (MCHJga 36 gektar sug‘oriladigan yer maydoni meʼyordan ortiq ajratib berilgan.) ‘Yetti saodat nuri‘ MCHJ rahbari Ixtiyor Panjiyevning yana qo‘shimcha yer maydoni ajratish haqidagi og‘zaki murojaatiga javoban unga qonun talablari tushuntirilgan”, — deydi tuman hokimligi axborot xizmati rahbari Xudoyberdi Yo‘ldoshev.
“Daryo” muxbiri bilan suhbatda bo‘lgan tuman hokimi Bekzod Suyunovning eslatishicha, prezidentning 2021-yil 8-iyundagi qarori asosida mahalliy hokimliklardan yer berish vakolati olingan. Shunga qaramasdan tuman hokimi o‘z vakolatidan kelib chiqqan holda fermerni qo‘llab-quvvatlashga tayyor.
“Fermerga kelgusida yer maydonini faqatgina auksion savdolari orqali olish tartibi tushuntirilgan. Bundan tashqari, tuman Irrigatsiya bo‘limi va tuman Nasos stansiyalari G‘uzor uchastkasidan olingan maʼlumotga ko‘ra, jamiyatga qarashli yer maydonini sug‘orish uchun yetarli miqdorda suv bo‘lgan va qo‘shimcha foydalanish uchun jamiyatda mavjud nosoz yer osti qudug‘i taʼmirlanib, suv chiqarish nasoslari o‘rnatib berilgan. Shuningdek, mahalliy hokimlik tomonidan mazkur fermer xo‘jaligiga bepul texnika xizmatlari ko‘rsatilgan va boshqa homiylik yordamlari bilan qo‘llab-quvvatlanib kelingan. Birgina, 2022-yilning oktyabr oyida tuman hokimligi tomonidan tumandagi yuqori unumli texnikalar jalb etilib, MCHJning 50 gektar yer maydonini 25 million 400 ming so‘mlik yer tayyorlash ishlari bepul bajarib berilgan. Tadbirkorni qo‘llab-quvvatlash maqsadida tuman hokimining aloqa xati orqali O‘zbekiston Respublikasi Markaziy bank va AT ‘Xalq banki‘ raislaridan ajratilgan kredit foizi va asosiy qismini so‘ndirishni vakolati doirasida biroz muddatga to‘xtatib turish haqida amaliy yordam so‘ralgan. Biz fermerni qo‘llab-quvvatlashga, qonuniy ko‘mak berishga tayyormiz”, — deydi bu xususida “Daryo” savollariga javob bergan G‘uzor tumani hokimi Bekzod Suyunov.
Izoh (0)