“Давлатнинг кредит сифатида ажратган 4 млрд сўм пулини шахсий эҳтиёжга сарфлаб, жавобгарликдан қутилиб қоламан дейиш хато” — Ғузор тумани ҳокими

Ғузор тумани ҳокимлиги тадбиркорнинг ҳокимлик биносига чорва молларини ҳайдаб келгани юзасидан расмий муносабат билдирди.

Аниқланишича, 2023 йилнинг 27 февраль куни ғузорлик фермер Ихтиёр Панжиевнинг укаси Жасур Панжиев кредит маблағларини ўзлаштиришда айбланиб, қамоққа олинган акасини қамоқдан чиқаришни талаб қилиб ўзига тегишли чорва молларини туман ҳокимлиги биноси олдига ҳайдаб келган.

Маълум бўлишича, Ғузор туманидаги “Етти саодат нуриъ МЧЖга 2020 йил 13 май куни АТ “Халқ банки” Ғузор филиали томонидан 4 миллиард 278 миллион сўм миқдоридаги кредит маблағи ажратилган. Фермер эса бу маблағга Австриядан 152 бош зотли қорамол олиб келган.

“Етти саодат нуриъ МЧЖ раҳбари Ихтиёр Панжиев бизнес режада кўрсатилган 'Чорвачиликни ривожлантириш, гўшт ва сут маҳсулотлари сотиш' фаолияти билан шуғулланмасдан, 2020 йилнинг сентябрь ноябрь ойларида Австриядан олиб келинган 4 миллиард 278 миллион сўмлик 152 бош наслли йирик шохли чорва молларининг 2 миллиард 561 миллион 445 минг 600 сўмга баҳоланган 98 бошини номаълум шахсларга сотиб юборган.

Вилоят ҳайвонлар касалликлари ташхиси ва озиқ-овқат маҳсулотлари хавфсизлиги давлат маркази томонидан нобуд бўлган чорва молларининг бирортасида юқумли ва бошқа касалликлар аниқланмаган бўлса-да, 2021 йилнинг 22 февраль ва 27 июль кунлари чорва моллари турли касалликлар сабабли ўлганлиги тўғрисида қалбаки далолатномалар расмийлаштириб, банкнинг жуда кўп миқдорда кредит маблағларини ўзлаштирилган.

Мазкур ҳолат юзасидан Бош прокуратура ҳузуридаги департаментнинг Ғузор тумани бўлими томонидан 2023 йил 29 январь куни “Етти саодат нури” масъулияти чекланган жамияти раҳбари Ихтиёр Панжиев АТ ”Халқ банки” Ғузор филиали мансабдор шахслари ва бошқаларга нисбатан Жиноят кодексининг 167-моддаси 3-қисми “а” банди (кўп миқдорда ўзлаштириш ёки растрата йўли билан талон-торож қилиш) ва бошқа моддалари билан жиноят иши қўзғатилган”, — дейилади Ғузор ҳокимлигининг расмий муносабатида.

Таъкидланишича, ҳолат юзасидан туман прокуратураси томонидан дастлабки тергов ҳаракатлари олиб борилмоқда. Тергов жараёнида жамият раҳбарига нисбатан қамоқ эҳтиёт чораси қўлланилган.

“Банк кредитини ажратиш жараёнида МЧЖга тегишли ер майдонлари етарли эканлиги эътиборга олинган. Хусусан, Ғузор тумани ҳокимининг 2019 йил 10 июндаги ва 2021 йил 29 январдаги қарорларига асосан МЧЖга жами 81,5 гектар, шундан 78,46 гектар суғориладиган ер майдонлари ажратиб берилган. Ер кодексининг 46-1-моддаси 1-қисми 3-бандида чорвачилик маҳсулотини ишлаб чиқаришга ихтисослашганларга озуқа экинларини етиштириш учун (шартли бир бош қорамол учун) суғориладиган ерлардан — камида 0,3 гектар ва лалмикор ерлардан — камида 1 гектар ўлчамда ажратилиши назарда тутилган. Ушбу қонун нормаларига кўра,  'Етти саодат нури' МЧЖ томонидан келтирилган 152 бош чорва моллари учун жами 45,6 гектар ер майдони талаб этилади. (МЧЖга 36 гектар суғориладиган ер майдони меъёрдан ортиқ ажратиб берилган.)'Етти саодат нури' МЧЖ раҳбари Ихтиёр Панжиевнинг яна қўшимча ер майдони ажратиш ҳақидаги оғзаки мурожаатига жавобан унга қонун талаблари тушунтирилган”, — дейди туман ҳокимлиги ахборот хизмати раҳбари Худойберди Йўлдошев.

“Дарё” мухбири билан суҳбатда бўлган туман ҳокими Бекзод Суюновнинг эслатишича, президентнинг 2021 йил 8 июндаги қарори асосида маҳаллий ҳокимликлардан ер бериш ваколати олинган. Шунга қарамасдан туман ҳокими ўз ваколатидан келиб чиққан ҳолда фермерни қўллаб-қувватлашга тайёр.

“Фермерга келгусида ер майдонини фақатгина аукцион савдолари орқали олиш тартиби тушунтирилган. Бундан ташқари, туман Ирригация бўлими ва туман Насос станциялари Ғузор участкасидан олинган маълумотга кўра, жамиятга қарашли ер майдонини суғориш учун етарли миқдорда сув бўлган ва қўшимча фойдаланиш учун жамиятда мавжуд носоз ер ости қудуғи таъмирланиб, сув чиқариш насослари ўрнатиб берилган. Шунингдек, маҳаллий ҳокимлик томонидан мазкур фермер хўжалигига бепул техника хизматлари кўрсатилган ва бошқа ҳомийлик ёрдамлари билан қўллаб-қувватланиб келинган. Биргина, 2022 йилнинг октябр ойида туман ҳокимлиги томонидан тумандаги юқори унумли техникалар жалб этилиб, МЧЖнинг 50 гектар ер майдонини 25 миллион 400 минг сўмлик ер тайёрлаш ишлари бепул бажариб берилган. Тадбиркорни қўллаб-қувватлаш мақсадида туман ҳокимининг алоқа хати орқали Ўзбекистон Республикаси Марказий банк ва АТ  'Халқ банки' раисларидан ажратилган кредит фоизи ва асосий қисмини сўндиришни ваколати доирасида бироз муддатга тўхтатиб туриш ҳақида амалий ёрдам сўралган. Биз фермерни қўллаб-қувватлашга, қонуний кўмак беришга тайёрмиз”, — дейди бу хусусида “Дарё” саволларига жавоб берган Ғузор тумани ҳокими Бекзод Суюнов.