Toshkentda tanishiga nashida yuborgani uchun 5 yilga qamalgan talaba yigit sud zalida ozod qilindi. Bu haqda Oliy sud axborot xizmati xabar berdi.
Xabarga ko‘ra, jinoyat ishlari bo‘yicha Olmazor tuman sudining 30 yanvardagi hukmi bilan S. Rahmonqulov Jinoyat kodeksining 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismi “g” bandida nazarda tutilgan jinoyatni sodir etganlikda aybli deb topilib, unga 5 yil muddatga ozodlikdan mahrum qilish jazosi tayinlangan.
Toshkent shahar sudining jinoyat ishlari bo‘yicha sudlov hay’atida 2 mart kuni sudlanuvchi S. Rahmonqulovning himoyachisi tomonidan keltirilgan apellyasiya shikoyati asosida ushbu jinoyat ishi apellyasiya tartibida ko‘rib chiqildi. Sudlov hay’ati apellyasiya instansiyasining 2 martdagi ajrimiga muvofiq birinchi instansiya sudining hukmi o‘zgartirilib, S. Rahmonqulovga tayinlangan 5 yil ozodlikdan mahrum qilish jazosi Jinoyat kodeksining 72-moddasi (shartli hukm qilish) qo‘llanilgan holda shartliga o‘zgartirilib, 2 yil sinov muddati belgilandi va u sud zalida qamoqdan ozod qilindi.
Shuningdek, Jinoyat kodeksining 62-moddasi (ushlab turish, qamoqqa olish yoki uy qamog‘i vaqtini hisobga olish qoidalari) tartibida S. Rahmonqulovning 7 oy 9 kun qamoqda saqlanganligi inobatga olinib, asosiy jazodan chegirib tashlandi.
Sud S. Raxmonqulovning o‘z qilmishiga iqror va pushaymonligi, unga nisbatan yengillik berish haqidagi kafolat xatlarini inobatga olgan holda hamda insonparvarlik va odillik tamoyillariga asoslanib qaror chiqardi.
Izoh (0)