Тошкентда танишига нашида юборгани учун қамалган талаба йигит озод қилинди

Тошкентда танишига нашида юборгани учун 5 йилга қамалган талаба йигит суд залида озод қилинди. Бу ҳақда Олий суд ахборот хизмати хабар берди.

Хабарга кўра, жиноят ишлари бўйича Олмазор туман судининг 30 январдаги ҳукми билан С. Раҳмонқулов Жиноят кодексининг 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми “г” бандида назарда тутилган жиноятни содир этганликда айбли деб топилиб, унга 5 йил муддатга озодликдан маҳрум қилиш жазоси тайинланган.

Тошкент шаҳар судининг жиноят ишлари бўйича судлов ҳайъатида 2 март куни судланувчи С. Раҳмонқуловнинг ҳимоячиси томонидан келтирилган апеллясия шикояти асосида ушбу жиноят иши апеллясия тартибида кўриб чиқилди. Судлов ҳайъати апеллясия инстанциясининг 2 мартдаги ажримига мувофиқ биринчи инстанция судининг ҳукми ўзгартирилиб, С. Раҳмонқуловга тайинланган 5 йил озодликдан маҳрум қилиш жазоси Жиноят кодексининг 72-моддаси (шартли ҳукм қилиш) қўлланилган ҳолда шартлига ўзгартирилиб, 2 йил синов муддати белгиланди ва у суд залида қамоқдан озод қилинди.

Шунингдек, Жиноят кодексининг 62-моддаси (ушлаб туриш, қамоққа олиш ёки уй қамоғи вақтини ҳисобга олиш қоидалари) тартибида С. Раҳмонқуловнинг 7 ой 9 кун қамоқда сақланганлиги инобатга олиниб, асосий жазодан чегириб ташланди.

Суд С. Рахмонқуловнинг ўз қилмишига иқрор ва пушаймонлиги, унга нисбатан енгиллик бериш ҳақидаги кафолат хатларини инобатга олган ҳолда ҳамда инсонпарварлик ва одиллик тамойилларига асосланиб қарор чиқарди.