Toshkentda tanishiga aqidaviy nashida jo‘natgan fuqaro sudlandi

Jinoyat ishlari bo‘yicha Toshkent shahri Olmazor tumani sudida 30 yanvar kuni fuqaro S.R.ga nisbatan jinoyat ishi ko‘rib chiqildi. U tanishiga aqidaparastlik g‘oyalari tasvirlangan qo‘shiq yuborgan.

Qayd etilishicha, S. R. dinga bo‘lgan qiziqishi zamirida Telegram’da ko‘chirib olingan aqidaparastlik g‘oyalari bilan yo‘g‘irilgan audioqo‘shiq (nashida)ni tanishiga yuborib, internet jahon axborot tarmog‘idan foydalanib tarqatgan.

Din ishlari bo‘yicha qo‘mita tomonidan berilgan 2022 yil 18 iyuldagi xulosasiga ko‘ra, diniy mazmundagi S.R. tarqatgan diniy qo‘shiq (nashida) aqidaparastlik g‘oyasi bilan yo‘g‘rilgan bo‘lib, bu kabi diniy materialni mamlakat hududiga olib kirish, tayyorlash va tarqatish taqiqlanganligi ko‘rsatilgan.

Jinoyat kodeksining 244-1-moddasi 3-qismida nazarda tutilgan jinoyatni sodir etganlik uchun qonunda 5 yildan 8 yilgacha ozodlikdan mahrum qilish jazosi belgilangan. S.R.ga nisbatan Jinoyat kodeksining 57-moddasini qo‘llab, modda sanksiyasida nazarda tutilgan jazodan ham kamroq jazo tayinlash uchun asoslar yetarli bo‘lmagan.