Ijtimoiy tarmoqlarda Andijon viloyatining Shahrixon tumanida 12 yoshli o‘g‘il bola o‘z joniga qasd qilgani to‘g‘risida xabar tarqaldi. “Daryo” holatga aniqlik kiritish maqsadida Bosh prokuratura axborot xizmati bilan bog‘landi.
Maʼlum qilinishicha, 27-fevral kuni soat 08:40 da Shahrixon tumanida yashovchi 5-sinf o‘quvchisi yashash xonadonidagi omborxona to‘siniga somon press ipi bilan o‘zini o‘zi osgan.
U o‘z joniga suiqasd qilgan vaqtida onasi bu holatni ko‘rib qolib, yordam bergan. Natijada bolaning hayoti saqlab qolinib, u tuman markaziy shifoxonasiga yotqizilgan.
Boladagi tan jarohatlarining og‘irlik darajasini aniqlash maqsadida sud-tibbiy ekspertizasi tayinlangan. Hodisa joyi ko‘zdan kechirilib, somon press ipi tekshirish uchun daliliy ashyo sifatida olingan.
“Daryo” muxbiri o‘quvchining holati haqida maʼlumot olish maqsadida Shahrixon tumani tibbiyot birlashmasi masʼullari bilan bog‘landi. Shifokorlarning taʼkidlashicha, o‘quvchi shifoxonaga hushsiz, og‘ir holatda olib kelingan. Ko‘rsatilgan tez tibbiy yordamlar natijasida uning ahvoli yaxshilangan, ayni paytda ahvoli o‘rtacha.
Hozirda Shahrixon tuman prokuraturasi tomonidan bolaning joniga qasd qilganlik sabablarini aniqlashga qaratilgan tergovga qadar tekshiruv harakatlari o‘tkazilmoqda.
Izoh (0)