Shavkat Mirziyoyev 2-mart kuni Boku shahrida Qo‘shilmaslik harakati Muloqot guruhining sammitida nutq so‘zlab, unda Afg‘onistondagi vaziyatga ham e’tibor qaratdi.
Prezident o‘z nutqida pandemiyadan keyingi davrda geosiyosiy va mafkuraviy ziddiyatlar kuchayib, ularning ta’sirida jahonning turli nuqtalarida yangi notinchlik o‘choqlari paydo bo‘layotgani barchani jiddiy tashvishga solayotganini qayd etdi.
“Bundan tashqari, Yaqin Sharq mintaqasi va Afg‘onistonda uzoq vaqtdan buyon saqlanib qolayotgan nizolarning global yechimi hanuzgacha topilgani yo‘q.
Ayniqsa, so‘nggi paytlarda barcha davlatlarda o‘sib borayotgan terrorizm va ekstremizmning xavf-hatariga qarshi Tashkilot doirasida amaliy aloqalarni kuchaytirish tobora dolzarb tus olayotganini alohida ta’kidlamoqchiman”, — dedi davlat rahbari.
Shavkat Mirziyoyev shunday tahlikali vaziyatda Qo‘shilmaslik harakatini terrorizmning har qanday ko‘rinishiga qarshi kurashning xalqaro-huquqiy bazasini mustahkamlash bo‘yicha umumiy intilishlarga yetakchilik qilishga chaqirdi.
“Ushbu jarayonda harakatga a’zo barcha davlatlarning BMT doirasida ko‘p tomonlama hamkorlikni yanada faollashtirishiga qat’iy ishonamiz. Shuningdek, bu muammolarni xalqaro miqyosda samarali hal etish va tizimli muvofiqlashtirishda BMT va uning ixt́isoslashgan tuzilmalari, albatta, asosiy rolni bajarishi lozim”, — dedi davlat rahbari.
Prezident BMTni isloh qilish jarayonida Xavfsizlik kengashi tarkibida kelgusida Qo‘shilmaslik harakati a’zolarining doimiy o‘rni bo‘lishi kerakligini aytdi.
“Shu o‘rinda afg‘on masalasi bo‘yicha algoritmni kelishish uchun BMT huzurida Xalqaro muzokaralar guruhini tuzishga doir O‘zbekiston taklifini qo‘llab-quvvatlaysizlar, deb ishonaman”, — dedi Shavkat Mirziyoyev.
Eslatib o‘tamiz, O‘zbekiston prezidenti 2022-yilning oktabrida Osiyoda hamkorlik va ishonch choralari bo‘yicha kengashning VI sammitida mamlakat xalqaro terroristik markazga aylanib qolmasligi uchun Afg‘onistondagi vaziyatni tartibga solish va u yerda tinch hayotni tiklash muhimligini qayd etgandi.
Shavkat Mirziyoyev Afg‘oniston muvaqqat hukumati bilan o‘zaro hamkorlik bo‘yicha umumiy, muvofiqlashgan yondashuvlarni ishlab chiqish zarurligini ta’kidladi. U Afg‘oniston hukumati bilan tomonlar majburiyatlarini bosqichma-bosqich bajarish algoritmini tayyorlash va kelishish uchun yuqori darajadagi xalqaro muzokaralar guruhini tuzish tashabbusi bilan Osiyo davlatlarining BMT Bosh Assambleyasiga qo‘shma murojaati imkoniyatini ko‘rib chiqishni taklif qilgandi.
Izoh (0)