Видео: Ҳиндистондаги ибодатхонада тирик фил ўрнига механик фил қўйилди. Бунга ҳайвон ҳуқуқлари фаолларининг саъй-ҳаракатлари билан эришилган

Ҳиндистоннинг Керала штатидаги ибодатхона маросимларда тирик филдан фойдаланишни тўхтатди — унинг ўрнига механик фил қўйилди. Робот фил People for Ethical Treatment (PETА) ҳайвонларни ҳимоя қилиш ташкилоти ва актриса Парвати Тирувоту томонидан совға қилинган.

The Indian Express нашрининг ёзишича, механик фил иштирокидаги илк маросим 26 февраль куни ўтказилган.

Ҳиндистонда турли маросимлар учун тутқунликда сақланаётган филлар қаттиқ машғулотлардан ўтказилади, хусусан, жониворлар аёвсиз калтакланади, деб таъкидлади PETА. Ҳайвонлар ҳуқуқларини ўрганиш маркази маълумотларига кўра, 2018 йилдан 2023 йилгача Кералада 150 га яқин тутқунликдаги фил нобуд бўлган.

PETА таъкидлашича, одамлар ўйин-кулги учун фойдаланадиган филлар кўпинча ғайритабиий хатти-ҳаракатлар қила бошлайди, бу одамларнинг ўлимига ҳам сабаб  бўлади.

Heritage Animal Task Force маълумотларига кўра, филлар Кералада сўнгги 15 йил ичида 500 дан ортиқ одамни ўлдирган.

Тахминан, 40 йилни тутқунликда ўтказган филлардан бири ўн кишининг ўлимига сабаб бўлган. Бироқ PETА маълумотларига кўра, у ҳали ҳам маҳаллий фестивалларда мунтазам иштирок этмоқда.