Xitoyning Spacety Co kompaniyasi Ukrainadagi jangovar harakatlarda qatnashayotgan “Vagner” xususiy harbiy kompaniyasi jangchilariga sun’iy yo‘ldosh tasvirlarini uzatgan. Bu haqda AQSH davlat kotibining Sharqiy Osiyo va Tinch okeani masalalari bo‘yicha yordamchisi Daniel Kritenbrink ma’lum qildi.
Spacety yanvar oyidan beri AQSH sanksiyalari ostida. AQSH Moliya vazirligi bayonotida kompaniya Ukraina hududining sun’iy yo‘ldoshdan olingan tasvirlarini “Vagner” guruhiga aloqador “Terra-Tex” kompaniyasiga uzatayotganini aytdi. Bu kompaniya ham Qo‘shma Shtatlar tomonidan qora ro‘yxatga kiritilgan, “Vagner”ning o‘zi esa transmilliy jinoiy tashkilot sifatida tan olingan.
Spacety kompaniyasi 2016-yilda tashkil etilgan. Kompaniya Pekinda joylashgan va keyinchalik Lyuksemburgda xalqaro shtab-kvartirasini ochgan. AQSH sanksiyalar ro‘yxatiga kiritilganidan so‘ng, firma Rossiyaga qarshi xalqaro sanksiyalarga rioya qilayotganini va cheklovlar kiritilgandan keyin Rossiya bilan aloqalarini qo‘llab-quvvatlamasligini bildirdi. “Bizning mahsulotlarimiz va xizmatlarimiz harbiy maqsadlarda ishlatishga mo‘ljallanmagan”, — deyiladi Spacety bayonotida.
AQSH rasmiylari Xitoy Ukrainada foydalanish uchun Rossiyaga qurol bermoqchi, deb gumon qilmoqda. Wall Street Journal va CNN manbalariga tayanib, Xitoy Rossiyaga uchuvchisiz uchoqlar, artilleriya tizimlari va o‘q-dorilar berishni ko‘rib chiqayotgani haqida xabar berdi, biroq hozircha bu borada qaror qabul qilinmagan. Fevral oyi oxirida AQSH prezidenti Jo Bayden Pekindan Moskvaga qurol uzatilgan taqdirda, Xitoy iqtisodiyoti jiddiy oqibatlarga uchrashi haqida ogohlantirdi.
Xitoy Tashqi ishlar vazirligi “jang maydoniga qurol yetkazib berayotgan” AQSHni “aybni o‘z zimmasidan soqit qilish va dezinformatsiya tarqatishni to‘xtatishga” chaqirdi. Ukraina tashqi ishlar vaziri Dmitriy Kuleba Kiyev Pekinning Moskvaga qurol jo‘natish niyatini tasdiqlamagani haqida gapirdi.
Izoh (0)