AQSH armiyasining Yevropa kuchlari operatsiyalaridagi ishtiroki paytida Amerika dengiz floti uchun havo qo‘mondonlik punkti vazifasini bajaradigan E-6B Mercury samolyoti Islandiyaga qo‘ndi. Bu haqda AQSH qo‘shinlarining Yevropadagi qo‘mondonligi shtab-kvartirasi Twitter’da ma’lum qildi.
“Ekipaj AQSHning Islandiyadagi elchisi Karrin Patman hamda boshqa diplomatik va harbiy rahbarlar bilan uchrashdi”, — deyiladi xabarda.
Samolyot “qiyomat kuni samolyoti” deb nomlanadi, chunki u yadroviy urush yuz bergan taqdirda asosiy rol o‘ynaydigan havo qo‘mondonligi va aloqa posti vazifasini bajaradi. Pentagon maʼlumotlariga ko‘ra, samolyot AQSH qo‘mondonligiga strategik va nostrategik qurollar, xususan, yadroviy arsenal bilan aloqa o‘rnatish imkonini beradi. Xususan, bort orqali uchirishni boshqarish tizimi yordamida yerdagi ballistik raketalarni uchirish mumkin.
1991-yilgacha Amerika armiyasining “qiyomat kuni samolyotlari” qariyb 30 yil davomida havoda bo‘lgan, ammo Sovuq urushning tugashi va budjetning qisqarishi bu boradagi yondashuvni o‘zgartirdi — bortlar quruqlikdagi jangovar tayyorgarlik holatiga o‘tkazildi, parvozlarni AQSHning g‘arbiy va sharqiy qirg‘oqlarida “kutilmagan holatlarga asoslanib” amalga oshirishga qaror qilindi.
Izoh (0)