“Rosatom” korporatsiyasi elektroenergetika tizimini modernizatsiya qilish uchun Toshkentga mutaxassislarni yuboradi. Bu haqda poytaxt hokimi vazifasini bajaruvchi Baxtiyor Rahmonov hamda “Rosatom”ning Energiya samaradorligi va infratuzilma yechimlari bo‘yicha loyiha byurosi direktori Yuriy Mishin bilan uchrashuvida ma’lum qilindi.
Qayd etilishicha, o‘zaro muloqot davomida Toshkentda elektr va issiqlik energiyasi ta’minotini yaxshilash, tizimda jiddiy uzilishlar bo‘lishining oldini olish, umuman, kommunal ifratuzilmani modernizatsiya qilish masalasi atroflicha ko‘rib chiqilgan.
Baxtiyor Rahmonov bugungi kunda poytaxt elektr energiyasi tizimidagi vaziyatga e’tibor qaratib, rejalashtirilgan va amalga oshirilayotgan ishlarga to‘xtalib o‘tgan. Bu yo‘nalishdagi tadbirlarda “Rosatom” bilan istiqbolli hamkorlik bo‘yicha taklif bildirilgan.
Yuriy Mishin bu borada tizim tashkilotlarida inventarizatsiya o‘tkazish, ish jarayoniga zamonaviy texnika va texnologiyalarni tatbiq etish samarali ekanini ta’kidlab, bunda ikki tomon mutaxassislarining hamkorlikdagi ishi orqali ijobiy natijalarga erishish mumkinligini ta’kidlagan va tez orada bu masalada zarur mutaxassislardan iborat ishchi guruhi Toshkentga kelishini qo‘shimcha qilgan.
Uchrashuvda tomonlar o‘zaro hamkorlik yo‘nalishlari va istiqbollarini ko‘rib chiqqan.
Shuningdek, Baxtiyor Rahmonov Rossiyaning LLK-Interneshnl mutasaddilari bilan ham uchrashib, poytaxtdagi yo‘llarni sifatli ta’mirlash masalasini ko‘rib chiqqan.
Ma’lumot uchun, 2018-yil iyul oyida “Atomenergoprom” korxonasi (“Rosatom” davlat korporatsiyasi tarkibiga kiradi) “Rosatom — Infrastrukturniye resheniya” shu’ba korxonasini tashkil etgan edi. U shaharlar hayotini taʼminlash infratuzilmasini, jumladan, issiqlik, elektr energiyasi, suv taʼminoti va toza suvni modernizatsiya qilishga, shu jumladan tuzsizlantirish, suvni tozalash va suvni tozalash bo‘yicha yechimlarni ishlab chiqishga qaratilgan “aqlli shahar” loyihalariga rahbarlik qiladi.
Izoh (0)